Lideri suprem i Iranit, Ayatollah Ali Khamenei, ka ndërmarrë vendim të rëndësishëm: ka emëruar pasardhësit e tij të mundshëm në rast se vritet.
Sipas një raportimi të New York Times, Khamenei – i cili thuhet se është strehuar në një bunker – i ka dorëzuar Asamblesë së Ekspertëve një listë me tre emra që duhet të konsiderohen për udhëheqjen politike dhe ushtarake të vendit, nëse ai humb jetën nga një sulm ajror izraelit.
Vendimi vjen mes një vale të re përshkallëzimi ushtarak midis Iranit dhe Izraelit, ku të dyja palët kanë kryer sulme të drejtpërdrejta ndaj njëra-tjetrës, ndërkohë që presidenti amerikan Donald Trump po shqyrton mundësinë e ndërhyrjes ushtarake të SHBA-së.
Sulmi i fundit izraelit ndaj Iranit konsiderohet si më i madhi që nga koha e luftës në Irak, duke shtuar ndjeshëm tensionet tashmë ekzistuese. Brenda Iranit, alarmi është i lartë. Burime të brendshme thonë se Khamenei është i shqetësuar për infiltrimin e mundshëm të operativëve izraelitë në strukturat e larta të sigurisë dhe inteligjencës iraniane.
“Është e qartë se kemi pasur një rrjedhje serioze në siguri dhe inteligjencë – kjo nuk mund të mohohet,” deklaroi Mahdi Mohammadi, këshilltar i kryetarit të parlamentit iranian.
Në këtë klimë mosbesimi, Këshilli Suprem i Sigurisë Kombëtare lëshoi një ultimatum: kushdo që ka bashkëpunuar me Izraelin duhet të vetëdorëzohet brenda ditës, përndryshe përballet me dënimin me vdekje.
Ndërkohë, zyrtarët kanë konfirmuar se djali i Khameneit, Mojtaba – i përfolur prej kohësh si pasardhës – nuk është përfshirë në listën e propozuar për Asamblenë e Ekspertëve.
Khamenei, i cili luajti rol kyç në revolucionin islamik të vitit 1979 dhe pas vdekjes së Khomeinit në vitin 1989 mori detyrën më të lartë në vend, ka qenë nën akuzë të vazhdueshme për mbështetjen e grupeve të armatosura si Hamas, Hezbollah dhe Houthit.
Por tani, me përhapjen e pasigurisë brenda strukturave shtetërore dhe rënien e autoritetit të tij, shumë e shohin këtë si fundin e afërt të regjimit islamik në Iran.