Ligji për njohjen e periudhave të sigurimit për efekt përfitimi, i miratuar më 30 janar 2025 për ish-punonjësit e shërbimeve shtetërore dhe kooperativave bujqësore, është vënë në qendër të debatit pas padisë së pensionistëve në Gjykatën Kushtetuese.
Ky ligj synon të njohë vitet e punës dhe të lehtësojë procedurat për përfitimin e pensionit, por ka ngjallur kundërshti të forta, pasi ai nuk përfshin një pjesë të rëndësishme të viteve të punës, veçanërisht ato të kryera para moshës 18 vjeç. Si pasojë, mijëra qytetarë pretendojnë se preken drejtpërdrejt, ndërsa tashmë pritet që Gjykata Kushtetuese të japë një vlerësim përfundimtar mbi këtë çështje.
Ilir Goci flet për padinë e pensionistëve
Për këtë çështje ka folur Presidenti i shoqatës së pensionistëve shqiptarë “Thinjat”, Ilir Goci. I ftuar në një studio televizive ai e cilësoi ligjin kriminal, duke shtuar se hiqen katër vite pune me një të rënë të lapsit. “Në 30 janar 2025 është miratuar ligji për njohjen e periudhave të sigurimit për efekt përfitimi, për ish-punonjësit e shërbimeve shtetërore dhe kooperativave bujqësore. Si nismë është e mirë se problematikat e hasura me sigurimet shoqërore, se ligji parashikon që do të njihen nga mosha 18 vjeç e lartë, mjafton që kërkuesi të bëjë kërkesën së pari, së dyti të vërtetojë që ka qenë banor i asaj kooperative dhe të mos ketë qenë i dënuar.
Heq gjithë vuajtjet nëpër gjyqe të gjithë pensionistëve. Por pjesa tjetër është e dhimbshme. Ligji thotë mbi 18 vjeç, por ligjet e kohës, Kodi i Punës, Kushtetutat e asaj kohe, parashikonin që i mituri që ka mbushur moshën 14 vjeç, ka aftësi të kufizuar, por me përgjegjësin e tij ligjor që është prindi, megjithatë ai ka të drejtë të punojë në kooperativën bujqësore dhe të ardhurat që siguron nga puna t’i disponojë lirshëm vetë dhe të hapë depozita që t’i posedojë lirshëm vetë.
Deri në moshën 18 vjeç do punonin gjashtë orë dhe nuk lejoheshin të punonin turni i dytë dhe turni i tretë. Sa mbaronin 8-vjeçaren direkt në kooperativë. Dhe ndërkohë këto vite pune nuk njihen dhe nuk paguhen. Ndërkohë që edhe fizikisht kanë qenë të paformuar. Synimi ynë është që t’i përfshijmë këto vite. Janë me mijëra qytetarë që preken. Ata që arrijnë moshën e pensionit, 65 vjeç për meshkuj, bëjnë një deklaratë dhe dokumentet e tjera shoqëruese që nuk ka qenë me heqje lirie, ai i depoziton dhe këtu mjafton.
Kërkojmë shfuqizimin e nenit 3, pika 1 paragrafi i parë të ligjit. Automatikisht atyre që kanë punuar në kooperativë iu heq katër vjet, ndërsa atyre që punojnë në ndërmarrje shtetërore iu heq tre vjet. Kërkesa është pranuar në Gjykatën Kushtetuese. Për mua është ligj kriminal, që në themel ai të nxjerr të miturin në punë. Nuk është kriminale të hiqen katër vite punë me një të rënë të lapsit. Ata që kanë punuar në kooperativë iu shkon diku te 18 mijë lekë të reja në muaj pensioni”, tha ai.
Pensionistët shqiptarë më të varfrit në Europë
Pensionistë shqiptarë janë më të varfrit në Europë. Në renditjet që kanë dalë për vendet e Europës nga shteti që i siguron pension qytetarit të tij të ketë një jetë dinjitoze, deri tek shteti që pensioni që u jep qytetarëve të vet nuk u mjafton as për të mbajtur frymën gjallë. Shqipëria renditet e parafundit, duke mbuluar vetëm 29 % të kostos së jetesës.
Comments are closed.