Të pranishëm janë familjarë të Fatos Nanos, mes tyre bashkëshortja e tij, Xhoana Nano, djali Sokoli dhe ish-bashkëshortja Rexhina.
Homazhet publike kanë nisur që prej orës 8:30. Ish-kryeministri Fatos Nano u nda nga jeta më 31 tetor, në moshën 73-vjeçare.
Vetëm një orë pas nisjes zyrtare të homazheve publike në Pallatin e Kongreseve, qindra qytetarë nga Tirana dhe rrethet janë mbledhur për t’i dhënë lamtumirën e fundit ish-kryeministrit Fatos Nano.
Radhë të gjata janë krijuar në hyrje të pallatit që në orët e para të mëngjesit, teksa qytetarë të moshave të ndryshme kanë marrë pjesë në këto homazhe, për të nderuar liderin historik të së majtës shqiptare.
Në hollin e madh, ku është vendosur arkëmorti i mbështjellë me flamurin kuqezi, qytetarët nuk kanë fshehur lotët dhe dhimbjen, duke ndalur për disa çaste pranë arkëmortit për të bërë një përkulje respekti.
Në ambientet e hollit, e ulur pranë arkëmortit qëndron bashkëshortja e tij Xhoana Nano, dy fëmijët e tij si dhe familjarët më të afërt, të cilët presin me përzemërsi qytetarët që vijnë për homazhe.Në sfond dëgjohet muzikë funebre, ndërsa punonjës të Gardës së Republikës ruajnë ceremonialin zyrtar.
Homazhet publike, të cilat nisën në orën 08:30, do të vijojnë deri në 11:00, për t’i lënë më pas vendin ceremonisë shtetërore ku do të marrin pjesë përfaqësues të lartë të shtetit, personalitete të jetës politike, kulturore dhe akademike.
Në orën 12:00, në të gjithë vendin do të mbahet një minutë heshtje, ndërsa në orën 12:05 do të nisë ceremonia e lamtumirës shtetërore, ku fjalën pritet ta marrë kryeministri Edi Rama si dhe Xhoana Nano.
Pas përfundimit të ceremonisë zyrtare, Fatos Nano do të përcillet për në banesën e fundit në një ceremoni private familjare.
Top Channel