Prej gati një muaji, Mali i Zi është tronditur nga një skandal seksual që ka përfshirë figura të larta shtetërore, pas publikimit të disa videove me përmbajtje intime. Ky skandal ka çuar në dorëheqjet e njëpasnjëshme të zyrtarëve, duke përfshirë emra të njohur të politikës dhe sigurisë.
Skandali nisi me publikimin e disa videove të Mirjana Pajkoviçit, e cila në atë kohë ishte sekretare e Ministrisë së të Drejtave të Njeriut dhe Minoriteteve. Në videot e publikuara, Pajkoviç shfaqet në momente intime me një burrë, dhe është ngritur dyshimi se personi që shfaqet në ato video është Dejan Vukshiç, ish-drejtor i Agjencisë Kombëtare të Sigurisë (ANS) dhe këshilltar i sigurisë i presidentit të Malit të Zi.
Pas daljes në publik të këtyre videove, Pajkoviç dha dorëheqjen nga posti i saj. Po ashtu, edhe Dejan Vukshiç dha dorëheqjen nga posti i drejtorit të ANS-së dhe nga pozita e këshilltarit të sigurisë i presidentit.
Pas publikimit të videove, Pajkoviç ka denoncuar shpërndarjen e paautorizuar të materialeve intime dhe ka ngritur akuza të rënda për kërcënime dhe shantazh. Ajo ka përshkruar publikimin e videove si një formë të dhunës dhe një shkelje të rëndë të të drejtave të njeriut. Në një kallëzim të bërë në polici, ajo ka deklaruar se është ekspozuar për një kohë të gjatë ndaj presionit dhe kërcënimeve.
Pajkoviç ka dorëzuar një audioincizim në të cilin dyshohet se është zëri i Vukshiçit, i cili e kërcënon atë duke thënë se “për të nuk ka jetë në Mal të Zi”, si dhe ka kërcënuar shkatërrimin e karrierës së saj.
Pajkoviç ishte një nga gratë e shquara në politikën e Malit të Zi dhe ishte shumë e pranishme në mediat sociale, veçanërisht në Instagram, ku shpesh ndante aspekte të jetës së saj private dhe profesionale. Ajo kishte bërë thirrje të vazhdueshme për të vënë në dukje presionin dhe paragjykimet që përjetojnë gratë në politikë, ku shpesh ato përballen me akuzat për mungesë serioziteti dhe professionalizmi nëse nuk paraqiten “në mënyrën e duhur”.
Në një intervistë të vitit 2022, Pajkoviç kishte thënë se preferonte Dejan Vukshiçin si udhëheqësin e saj të preferuar në Mal të Zi, një qëndrim që më vonë ka marrë një rëndësi të madhe pasi Vukshiç u bë një figurë kyçe në sistemin shtetëror të vendit.
Pas kallëzimeve të Pajkoviç, Prokuroria Shtetërore në Podgoricë ka nisur hetime dhe ka hapur dy raste për shkelje të ligjit. Aktualisht, procedurat janë në fazën e hetimeve dhe autoritetet po punojnë për të zbardhur plotësisht ngjarjen dhe për të nxjerrë para drejtësisë ata që janë përgjegjës për shpërndarjen e materialeve intime dhe kërcënimet.
