Një tjetër akt dhune ka tronditur Ekuadorin. Policia kombëtare njoftoi se shtatë persona u ekzekutuan me armë zjarri në një sallë bilardoje, në distriktin e jetës së natës në Santo Domingo, rreth 150 kilometra në perëndim të kryeqytetit Quito.
Sipas autoriteteve, disa individë të armatosur, të maskuar me kapuçë të zinj, hapën zjarr ndaj dy burrave që ndodheshin te hyrja e lokalit. Sulmi shkaktoi panik te kalimtarët, ndërsa autorët hynë më pas brenda sallës dhe vijuan të qëllonin pa dallim, përpara se të arratiseshin, pak minuta para mbërritjes së policisë.
Mediat lokale raportojnë se pistat kryesore të hetimeve lidhen me krimin e organizuar, që ka rritur ndjeshëm aktivitetin në këtë zonë. Ngjarja e rëndë ndodh vetëm një muaj pas masakrës në qytetin turistik General Villamil Playas, ku të paktën 9 persona humbën jetën në një tjetër sallë bilardoje. Po ashtu, në prill, 12 persona u vranë në një arenë për duele gjelash, vetëm 30 kilometra larg Santo Domingos.
Ekuadori, dikur një nga vendet më të qeta të Amerikës Latine, është zhytur në një krizë të thellë sigurie për shkak të zgjerimit të karteleve ndërkombëtare të drogës, të cilat shfrytëzojnë portet e vendit për trafik drejt SHBA-së dhe Europës.
Statistikat flasin për një përshkallëzim alarmant të dhunës: nga 6 vrasje për 100 mijë banorë në vitin 2018, ky tregues u rrit në 38 për 100 mijë në vitin 2024. Vetëm nga janari deri në maj të këtij viti, janë regjistruar mbi 4,051 vrasje, duke e bërë këtë periudhë më të përgjakshmen në historinë e fundit të vendit.
Fundjavën e kaluar, 14 persona u vranë në masakra të tjera në provincën e Guayas, një nga katër provincat ku presidenti Daniel Noboa ka shpallur gjendjen e jashtëzakonshme.