Ashtu siç ndodh gjithmonë në çdo skandal, krim apo ngjarje, mediat greke vijojnë të bëjnë fajtorë të parët shqiptarët.
Mediat e Athinës kanë shkuar deri aty sa kanë ngritur dyshime se droni detar misterioz që u gjet në Lefkada të enjten, mund të jetë nisur nga Shqipëria.
Droni u gjet brenda një shpelle, me motorin ndezur. Pjesa e sipërme kishte sensorë të veçantë, antena dhe pajisje komunikimi me teknologji të lartë. Është një USV, një anije sipërfaqësore pa pilot që përdoret kryesisht për qëllime ushtarake, të tilla si mbikëqyrje, mbledhje inteligjence apo edhe operacione speciale, por edhe për kërkime të avancuara shkencore.
Pas verifikimeve, u konstatua se bëhet fjalë për një dron, i cili përdoret nga ushtria ukrainase. Ka shumë mister se si ky dron ka arritur në brigjet greke.
Por media greke “Militaire.gr” që merret me çështjet e mbrojtjes, duket se i ka gjetur fajtorët: Ata janë shqiptarët dhe turqit.
Sipas kësaj medie, e cila për hir të së vërtetës nuk është se merret shumë për bazë, droni mund të jetë nisur nga turqit në bazën e “Pashalimanit”.
“Pyetja se nga e kishte origjinën dhe nga e kontrollonte droni mbetet pa përgjigje. Megjithatë, shumë njerëz mendojnë për Shqipërinë, ku thuhet se turqit mbajnë një bazë detare. Turqia mban një prani në bazën detare të Pashalimanit në gjirin e Vlorës, në Shqipëri, e cila përdoret nga marinat shqiptare dhe turke. Baza e financuar nga Turqia konsiderohet strategjikisht e rëndësishme për ndikimin turk në rajon. Kush mund ta përjashtojë mundësinë e bashkëpunimit midis turqve dhe ukrainasve? Vetëm qeveria greke nëse vendos të ndalojë së heshturi. Duhet të merret si e mirëqenë që Athina do t’i kërkojë Kievit shpjegime. Apo ndoshta nuk është aq e vetëkuptueshme”, shkruan artikullshkruesi.
Duket qartë që është një shashkë mediatike, dhe mediat greke janë bërë mjeshtre të dezinformimit kur vjen puna te shqiptarët. /Pamfleti
Comments are closed.