Një deklaratë tronditëse e bërë nga komisionerja e policisë për Devon dhe Cornwall, Alison Hernandez, ka shkaktuar alarm në opinionin publik britanik. Ajo deklaroi se në një zonë pyjore afër qytetit Sticker janë zbuluar “trupa të shumta”, duke ndezur spekulime për një krim të përmasave të frikshme.
Por pak orë pas kësaj deklarate, policia e Devon dhe Cornwall mohoi kategorikisht pretendimet. Sipas autoriteteve, deri më tani është gjetur vetëm trupi i Daniel Coleman, 43 vjeç, i cili kishte qenë i zhdukur dhe për të cilin është arrestuar James Desborough, 39 vjeç, tashmë i akuzuar për vrasje.
Zëdhënës të policisë konfirmuan se janë duke u zhvilluar hetime për tre raste të veçanta vrasjeje në rajon, por nuk ka asnjë provë që ato të jenë të lidhura apo që në pyll të jenë gjetur trupa të tjerë. Komisionerja Hernandez më pas kërkoi falje për keqkuptimin dhe u shpreh se deklarata e saj ishte bërë pa informacion të plotë.
Ndërkohë, hetimet në pyllin Paramoor vijojnë, dhe policia i ka bërë thirrje qytetarëve dhe mediave që të shmangin spekulimet, pasi çdo informacion i pasaktë mund të dëmtojë procesin hetimor dhe ndjekjen penale të çështjes. Gjykimi për vrasjen e Coleman pritet të nisë më 8 gusht në Truro Crown Court.