Një avion pasagjerësh me 242 persona në bord është rrëzuar në një zonë të banuar pranë aeroportit ndërkombëtar Sardar Vallabhbhai Patel në Ahmedabad, Indi.
Sipas raportimeve të Times of India, bëhet fjalë për një Boeing 787 Dreamliner të kompanisë Air India, që kishte si destinacion Londrën dhe u rrëzua vetëm pak çaste pas ngritjes.
Pas përplasjes, një re e madhe tymi është parë duke u ngritur nga zona e afërt me aeroportin, ndërsa ekipet e emergjencës kanë mbërritur menjëherë në vendngjarje.
Platforma FlightRadar, në një postim në X, njoftoi: “Jemi duke ndjekur raportimet për rrëzimin e fluturimit #AI171 të Air India. Sipas të dhënave tona, sinjali i fundit nga avioni është marrë në orën 08:08:51 UTC, pak sekonda pas ngritjes.”
Ministri i Brendshëm i Indisë, Amit Shah, ka zhvilluar konsultime urgjente me autoritetet lokale dhe ka siguruar ndërhyrje të menjëhershme nga qeveria qendrore.
Hetimet për shkaqet e aksidentit janë në zhvillim, ndërkohë që ende nuk ka të dhëna të konfirmuara për numrin e viktimave apo të lënduarve.