Publikohen pamjet e aksidentit të rëndë në aeroportin LaGuardia në New York, ku një avion i kompanisë Air Canada u përplas me një mjet zjarrfikës gjatë uljes në pistë.
Videot nga kamerat e sigurisë tregojnë momentin kur avioni tip Bombardier CRJ-900 prek pistën me shpejtësi të lartë dhe godet mjetin që ndodhej në trajektore, në kushte shiu të dendur. Përplasja shkakton një shpërthim të madh uji dhe devijimin e fortë të mjetit zjarrfikës.
Sipas të dhënave paraprake, dy pilotët humbën jetën në vend, ndërsa 41 persona të tjerë, përfshirë edhe dy persona në mjetin zjarrfikës, u transportuan në spital me lëndime të ndryshme. Autoritetet nuk kanë bërë ende publike identitetet e viktimave.
Regjistrimet audio nga kontrolli i trafikut ajror zbulojnë tensionin e momenteve të fundit para aksidentit. Dëgjohen thirrje të përsëritura “Ndal, ndal, ndal!” drejtuar mjetit, i cili kishte marrë leje për të kaluar pistën për një tjetër emergjencë. Kontrollorët duket se kanë kuptuar rrezikun vetëm pak sekonda përpara përplasjes.
Një pasagjer i mbijetuar e përshkroi uljen si fillimisht normale, por shumë të fortë, e ndjekur menjëherë nga përplasja. “Njerëzit u hodhën në ajër, avioni filloi të lëkundej majtas-djathtas. Ishte kaos”, deklaroi ai për mediat amerikane.
Autoritetet kanë nisur hetimet për të përcaktuar përgjegjësitë dhe për të sqaruar nëse bëhet fjalë për një gabim njerëzor apo një dështim në koordinimin e procedurave të sigurisë në pistë.
Comments are closed.