Intensiteti i lartë i reshjeve në një kohë shumë të shkurtër e ka bërë situatën të vështirë për t’u menaxhuar, ndërsa infrastruktura kulluese nuk ka arritur të përballojë fluksin e madh të ujit të grumbulluar. Si pasojë e situatës, disa rrugë të qytetit janë përmbytur, ndërsa uji ka depërtuar edhe në ambientet e Komisariatit të Policisë Himarë.

Në lidhje me situatën, Bashkia Himarë ka reaguar me një njoftim zyrtar, duke u bërë thirrje qytetarëve të tregojnë kujdes maksimal.  Autoritetet lokale u kërkojnë qytetarëve të shmangin çdo lëvizje që nuk është e domosdoshme, si me automjete ashtu edhe në këmbë, dhe të qëndrojnë në ambiente të sigurta deri në përmirësimin e kushteve të motit.

“Të nderuar qytetarë, banorë të Himarës dhe fshatrave të saj! Prej mëngjesit të sotëm, rajoni ynë është përfshirë nga një valë reshjesh me intensitet shumë të lartë, duke shkaktuar vërshime të përrenjve, të cilët kanë dalë nga shtrati duke përmbytur rrugë dhe mjedise të tjera. Ju bëjmë thirrje që të shmangni çdo lëvizje që nuk është e domosdoshme, qoftë me automjete apo në këmbë. Qëndroni në mjedise të sigurta, derisa kushtet e motit të përmirësohen. Bashkia dhe çdo punëtor dhe mjet i saj janë në krye të detyrës për të ndikuar në zbutjen e pasojave të motit dhe parandalimin e dëmeve në pronën publike dhe private. Faleminderit për mirëkuptimin dhe bashkëpunimin”, njofton Bashkia Himarë.