Sipas sinoptikanes Tanja Porja, gjatë 24 orëve të ardhshme pritet të kemi mot kryesisht me kthjellime dhe vranësira kalimtare. Në pjesën e dytë të ditës, vranësirat do të zhvillohen kryesisht në zonat jugore dhe juglindore, ku do të sjellin rrebeshe afatshkurtra shiu. Reshjet do të jenë më të pakta në lindje dhe pjesërisht në qendër të territorit.
Temperaturat do të shënojnë një rënie të lehtë në mesditë, duke zbritur deri në 36°C. Era do të fryjë nga veriperëndimi me intensitet mesatar, ndërsa në zonat bregdetare dhe hapësirat detare priten herë pas here edhe era të forta.
Paraditja e nesërme do të sjellë kthjellime në pjesën më të madhe të vendit, ndërsa vranësira të lehta do të shfaqen në veri dhe verilindje. Në mesditë, vranësirat do të jenë më të dukshme në jug dhe juglindje, ku do të kemi reshje të izoluara kryesisht në qarqet Korçë, Përmet, Gjirokastër dhe pjesërisht në Tepelenë. Në zonat lindore të qarqeve Berat, Elbasan dhe Tiranë mund të ketë reshje të lehta dhe të përkohshme. Ndërkohë, pjesa më e madhe e perëndimit pritet të mbetet me mot të kthjellët.
Temperaturat e mëngjesit do të jenë të ulëta në zonat malore (rreth 9°C), ndërsa në zonat perëndimore do të luhaten nga 13°C deri në 16°C. Në mesditë, temperaturat në zonat malore do të variojnë nga 28°C deri në 30°C, ndërsa në perëndim dhe jugperëndim mund të arrijnë deri në 36°C në pika të izoluara.
Parashikimi për 5 ditët në vijim
Gjatë pjesës së dytë të ditës së mërkurë priten reshje të pakta dhe të izoluara në juglindje dhe verilindje. Nga dita e enjte e në vijim, do të mbizotërojë moti i kthjellët dhe me vranësira të lehta, pa reshje.
Temperaturat do të ndjekin një trend të rënies së lehtë dhe graduale, si në mëngjes ashtu edhe në mesditë. Deri në fundjavë pritet që maksimumet të mos i kalojnë 33–34°C, ndërsa temperaturat do të jenë rreth 7 gradë më të ulëta se ditët e mëparshme.
Kushtet e motit në Ballkan për ditën e nesërme
Në Ballkan, moti do të jetë kryesisht me kthjellime. Reshje të pakta dhe afatshkurtra do të shfaqen në zonat juglindore, veçanërisht në jugun e Maqedonisë së Veriut, juglindje të Shqipërisë dhe veri të Greqisë. Në brigjet perëndimore dhe në veri të Ballkanit do të mbizotërojë moti i kthjellët.
Temperaturat e mëngjesit do të jenë relativisht të larta (14–15°C në shumicën e kryeqyteteve), ndërsa në jug ato do të arrijnë deri në 20–21°C. Maksimumet do të luhaten nga 32°C në veri dhe lindje deri në 34–35°C në bregdetin perëndimor të Ballkanit. Në Athinë pritet që termometri të ngjitet deri në 37°C.
Moti në Europë dhe Atlantikun e Veriut
Në nivel kontinental, një stuhi e fuqishme ciklonare është aktive në Atlantikun e Veriut dhe po ndikon në motin e Ishujve Britanikë, veriperëndimit të Europës dhe Skandinavisë, me rrebeshe afatshkurtra dhe reshje me intensitet mesatar në rajonin e Balltikut.
Vranësira do të jenë të pranishme në gadishullin Iberik dhe në brigjet perëndimore të Europës, por pa reshje të konsiderueshme. Ndërkohë, në Alpe, në rajonin e Mesdheut dhe Ballkan, do të kemi kthjellime të gjera.
Në veri dhe veriperëndim të kontinentit temperaturat do të jenë të ulëta, me vlera të mëngjesit rreth 7–8°C dhe maksimume që nuk e kalojnë 20–21°C. Në jug të kontinentit, temperaturat mbeten të larta, ku në Pragë parashikohen rreth 30–31°C, ndërsa në Barcelonë dhe Athinë priten temperatura që arrijnë deri në 37°C.