Aktori amerikan James Van Der Beek, i njohur për rolin e tij si Dawson Leery në serialin e famshëm “Dawson’s Creek”, është ndarë nga jeta në moshën 48-vjeçare, pas një beteje me kancerin e zorrës së trashë.
Lajmi u konfirmua nga bashkëshortja e tij, Kimberly Van Der Beek, përmes një postimi në rrjetet sociale. Në mesazhin e saj, ajo bëri të ditur se aktori ndërroi jetë në paqe, duke theksuar guximin dhe dinjitetin me të cilin ai përballoi ditët e fundit.
“I dashuri ynë James David Van Der Beek ndërroi jetë në paqe këtë mëngjes. Ai i përballoi ditët e tij të fundit me guxim, besim dhe dinjitet. Për momentin, kërkojmë privatësi ndërsa vajtojmë humbjen e bashkëshortit, babait, birit, vëllait dhe mikut tonë të dashur”, shkroi ajo.
Van Der Beek u diagnostikua me kancer në vitin 2023 dhe e bëri publike diagnozën në vitin 2024, duke u shprehur në atë kohë se kishte arsye për optimizëm.
I lindur më 8 mars 1977 dhe i rritur në Connecticut, ai shfaqi interes për aktrimin që në moshë të re, duke marrë pjesë në shfaqje shkollore dhe duke ndjekur audicione në New York. Pas suksesit me rolin kryesor në “Dawson’s Creek”, ai ndërpreu studimet në Universitetin Drew në New Jersey për t’iu përkushtuar karrierës artistike.
Seriali “Dawson’s Creek”, ku luanin gjithashtu Katie Holmes, Michelle Williams dhe Joshua Jackson, u transmetua për herë të parë në vitin 1998 dhe u kthye në një fenomen televiziv, duke e bërë Van Der Beek një nga figurat më të njohura të ekranit në fund të viteve ’90.
