“Rrugëtimi ynë i përbashkët nisi pesëdhjetë vite më parë, i bekuar me dashuri të madhe, kujtime të çmuara dhe sfida të shumta. Më e vështira ishte kjo e dy viteve të fundit, ku luftuam së bashku, dorë për dore, të pandarë, me gjithë forcën e shpirtit tonë. Por në fund, vullneti i Zotit e deshi Piron pranë vetes.
Piro do të jetojë përherë në kujtesën dhe zemrat tona për urtësinë e rrallë, fisnikërinë e heshtur, krenarinë, idealet dhe fjalët e pakta, por gjithmonë të mençura. Dashuria jote, prania jote, drita e shpirtit tënd do të na mungojnë pafund. Ti je pjesë e jona sot, nesër dhe përjetësisht”, shkruan Lindita, duke ju referuar bashkëshortit të ndjerë edhe si Pirro, ashtu siç e thërrisnin familja dhe miqtë.
Familja falënderon me mirënjohje të gjithë ata që do të ndajnë me të këtë dhimbje dhe njofton se pritjet do të bëhen në Shtëpinë Funerale ALBA 2000, në Rrugën e Durrësit, datë 23 janar, ora 15:00 – 20:00. Ceremonia mortore do të mbahet ditën e shtunë, datë 24 janar, ora 11:00, në Tufinë.
Një reagim të ndjerë për ndarjen nga jeta të yllit të basketbollit tiranas ka bërë edhe ish-ministrja socialiste Milena Harito. Ajo shkruan se Spiro Koleka, apo Pirro, ishte daja i saj.
“Zemër thyer … plot kujtime fëmijërie me daja Pirron, nga shtëpia e gjyshes, tek xhirua e Tiranës dhe plazhi i Durrësit. Nostalgji për atë kohë të artë kur loznim bashkë -vetëm 15 vite na ndanin në moshë me Pirron, edhe më pak me Lindën tek shtëpia e vjetër tiranase, ku qepnim fustane për kukllat.
Krenari e admirim më pas për ikonën – yll i basketbollit dhe jo vetëm ; atmosfera elektrike e ndeshjeve Tirana-Partizani që na linin me zemër në dorë deri në minutat e fundit, era e parketit të stadiumit të lojrave me dorë … dhe qyfyret antikomuniste aq sa mundnim me ekipin…”, shkruan Milena Harito teksa ndan kujtimet me familjen Koleka.
