Kupa e Kombeve të Afrikës (AFCON) është tronditur nga lajmi tragjik i vdekjes së djalit të Stephane Aziz Ki
Ylli i Burkina Fasos ndodhet aktualisht me përfaqësuesen e tij në turne, ndërsa klubi i tij ka reaguar me një mesazh ngushëllimi pas këtij lajmi prekës.
Në deklaratë thuhet:
“Me dhimbje dhe trishtim të thellë, Wydad AC shpreh ngushëllimet më të sinqerta për lojtarin tonë Aziz Ki për ndarjen nga jeta të djalit të tij. I lutemi Zotit të Madhërishëm ta mëshirojë të ndjerin, t’i japë një vend në Parajsë dhe t’i dhurojë familjes dhe të afërmve durim dhe qetësi.”
Në prag të Vitit të Ri, Aziz Ki ndihmoi përfaqësuesen e Burkina Fasos të siguronte një vend mes dy më të mirave dhe kualifikimin nga Grupi E në Kupën e Afrikës, pas fitores ndaj Sudanit.
Ai asistoi në golin e parë të fitores 2-0, që i garantoi ekipit vendin e dytë në grup. Në fazën e 1/8-ve, Burkina Faso do të përballet me një sfidë të madhe ndaj Bregut të Fildishtë, ndeshje që do të luhet të martën, më 6 janar.
Aziz Ki dhe bashkëlojtarët e tij fituan dy ndeshje dhe humbën një në fazën e grupeve. Ata mposhtën Guinenë Ekuatoriale 2-1, përpara se të pësonin humbje 1-0 ndaj fituesve të grupit, Algjerisë.
Fitorja ndaj Sudanit më pas u siguroi vendin e dytë në grup, në një përballje ku të dyja ekipet hynë me pikë të barabarta. Aziz Ki, 29 vjeç, aktivizohet në nivel klubesh te Wydad Athletic Club.
Ai iu bashkua Wydad-it vitin e kaluar, pasi më parë kishte luajtur për Young Africans në Tanzani. /Panorama Sport/
