Një aksident i rëndë rrugor i ndodhur mbrëmjen e së shtunës në aksin Lezhë–Gjadër i ka marrë jetën babë e bijë.
Viktimat janë Anton Keçi, 52 vjeç, dhe vajza e tij Bora Keçi, 20 vjeçe. Automjeti me të cilin udhëtonin ka dalë nga rruga në zonën e Gocajt, duke shkaktuar vdekjen e të dyve.52-vjeçari punonte si shef i Shëndetësisë në burgun e Lezhës dhe kishte rreth 6 vite përvojë në sistemin penitenciar. Vajza e tij ishte studente në vitin e dytë në Fakultetin e Mjekësisë, duke ndjekur të njëjtën fushë si i ati.
Të dy kishin qenë të angazhuar edhe me kohë të pjesshme në kampin e refugjatëve në Gjadër.Ngjarja ka shkaktuar tronditje te familjarët dhe kolegët. Drejtoria e Burgjeve ka shprehur ngushëllime për familjen, duke vlerësuar kontributin profesional të 52-vjeçarit dhe duke ndarë dhimbjen për këtë humbje të rëndë.
Një tragjedi me përmasa të rënda ajo që ka ndodhur natën duke nisur dita e diel 26 prill. Një vajzë 20 vjeçare dhe babai i saj u gjetën të vdekur në makinën e tyre.
Zbulimi i tyre u bë pasi djali i shtëpisë u bë merak që nuk po lidhej me të atin dhe të motrën:
Rreth orës 21:45 të datës 25 prill 2026, në Komisariatin e Policisë Lezhë është paraqitur djali i shtetasit A. K., i cili ka kallëzuar se ka humbur kontaktet me babain dhe me motrën e tij, të cilët ishin nisur për në punë me automjetin e tyre.
Menjëherë pas marrjes së njoftimit, shërbimet e Policisë kanë ushtruar kontrolle për gjetjen e tyre.
Në fshatin Gocaj, në afërsi të fabrikës së çimentos, në një rrugë dytësore, u gjet automjeti i tyre në një kanal me ujë.
Pas nxjerrjes së automjetit nga uji, rezultoi se në automjet ndodheshin pa shenja jete shtetasit A. K., 54 vjeç, dhe B. K., 20 vjeçe (babë e bijë).
Paraprakisht dyshohet se automjeti ka dalë nga rruga si pasojë e humbjes së kontrollit mbi drejtimin e tij nga ana e drejtueses së automjetit, shtetases B. K.
Grupi hetimor ndodhet në vendngjarje dhe po punon për sqarimin e rrethanave, përcaktimin e shkakut të daljes nga rruga të automjetit dhe për dokumentimin e plotë ligjor.
Comments are closed.