Kreu i një prej organizatave kriminale të cilët aktivitetin e tyre e kishin shtrirë në të gjithë Europën ka rënë në prangat e Policisë së Shtetit.
Bëhet fjala për 59-vjeçarin Ilir Kociaj (Koçiaj) i cili më herët është dënuar nga Italia me 18 vite burg për veprën penale “Trafikimi i lëndëve narkotike”, kryer në kuadër të një organizate kriminale.
Arrestimi i këtij shtetasi u bë i mundur falë informacioneve të siguruara në kohë reale nga blutë të cilët pas identifikimit dhe lokalizimit mundën që ta arrestojnë.
Ndonëse fillimisht u përballën me rezistencën e 59-vjeçarit i i cili tentoi t’u ikte efektivëve me automjetin e tip tip “Audi”, policia arriti që ta arrestonte në autostradën Tiranë-Durrës.
Ky shtetas ishte shpallur në kërkim nga Drejtoria Vendore e Policisë Elbasan, në zbatim të vendimit të Gjykatës së Apelit Tiranë për njohjen e vendimit të Gjykatës së Firences, Itali, që e dënon atë me 18 vite burgim, për veprën penale “Trafikimi i lëndëve narkotike”, kryer në kuadër të një organizate kriminale.
Vite më parë, Prokuroria e Përgjithshme i sekuestroi Kociajt mbi 13 prona të paluajtshme, vlera e të cilave arrinte në 500 mijë euro.
Hetimi pasuror ndaj tij nisi fillimisht nga Prokuroria e Elbasanit, pasi ai u dënua me 10 vjet e 8 muaj burgim nga Gjykata për Krime të Rënda, për kryerjen e veprës penale “trafikimi i narkotikëve”, të kryer në formën e organizimit. Ai u shpall fajtor pasi, në bashkëpunim me persona të tjerë, kryenin veprimtarinë kriminale të trafikimit të lëndëve narkotike nga Hollanda në Itali, në disa episode, të cilat kanë ndodhur në vitin 2003.
Asokohe, nga veprimet hetimore rezultoi se në emër të tij figuronin 11 njësi tregtare në Elbasan dhe 2 apartamente në Tiranë, të cilat dyshohej se kanë pasur prejardhjen nga veprimtaria kriminale e tij.
Njoftimi i Policisë:
Tiranë/Finalizohet operacioni policor i koduar “Hierarkia”.
Kapet kreu i një organizate kriminale ndërkombëtare, shtetas me rrezikshmëri shoqërore, i dënuar me 18 vjet burgim.
59-vjeçari tentoi t’iu ikte shërbimeve të Policisë, me një automjet tip “Audi Q5” që u sekuestrua nga Policia.
Si rezultat i një pune të mirorganziuar informative dhe operacionale, shërbimet e Seksionit të Kërkimit të Sektorit të Forcës së Posaçme për Operacione Speciale dhe Kërkime, në bashkëpunim me shërbimet e Forcës së Posaçme “Shqiponja”, finalizuan me sukses operacionin “Hierarkia”, gjatë të cilit u vu në pranga shtetasi:
-Ilir Kociaj (Koçiaj), 59 vjeç.
59-vjeçari, u kap në flagrancë teksa tentonte të largohej me automjetin e tij, në autostradën “Tiranë–Elbasan”.
Shtetasi Ilir Kociaj (Koçiaj) ishte shpallur në kërkim nga Drejtoria Vendore e Policisë Elbasan, në zbatim të vendimit të Gjykatës së Apelit Tiranë për njohjen e vendimit të Gjykatës së Firences, Itali, që e dënon atë me 18 vite burgim, për veprën penale “Trafikimi i lëndëve narkotike”, kryer në kuadër të një organizate kriminale.
59-vjeçari iu dorëzua Policisë së Elbasanit, për kryerjen e veprimeve të mëtejshme.