Gazetari Bled Mane ka reaguar ashpër ndaj ministres së Arsimit, Mirela Kumbaro, në një kohë kur protestat e studentëve dhe pakënaqësitë ndaj kushteve të arsimit janë kthyer në një nga temat më të diskutuara në vend.
Përmes një postimi në rrjetet sociale, Mane ka pretenduar se fëmijët e ministres studiojnë jashtë Shqipërisë, përkatësisht djali në Holandë dhe vajza në Francë, duke kritikuar atë që ai e konsideron një kontrast mes mundësive të familjes së saj dhe realitetit me të cilin përballen studentët shqiptarë.
“Që këtu fillon tallja publike, shkolla cilësore dhe kushte perfekte për fëmijët e saj dhe konkretisht djali në Hollandë e vajza në Francë, ndërsa për studentët shqiptarë halle, siklete, probleme dhe shkollë e jetesë e varfër”, shkruan Mane.
Gazetari ka shkuar edhe më tej, duke kërkuar dorëheqjen e Kumbaros dhe duke propozuar që ministrat e ardhshëm të Arsimit, pavarësisht përkatësisë politike, t’i kenë fëmijët në institucionet arsimore shqiptare.
“Natyrisht Mirela Kumbaro duhet të dorëhiqet urgjentisht, por herë tjetër kushdo ministër arsimi që do vijë, majtas apo djathtas, nga protesta apo nga partitë politike, patjetër duhet t’i ketë fëmijët nxënës e studentë në shkollat e Shqipërisë”, shprehet ai.
Sipas Manes, kjo do t’u mundësonte drejtuesve të arsimit të njiheshin më nga afër me kushtet dhe cilësinë e sistemit për të cilin mbajnë përgjegjësi.
