Policia e Shtetit ka mundur që të bjerë në gjurmët e dy magazinave në të cilën stampoheshin veshje të kontrabanduara, me logo false.
Përmes një njoftimi zyrtar blutë bëjnë me dije se në finalizim të operacionit policor të koduar “Fake Star 5”, u bë i mundur arrestimi i katër personave, si dhe shpallja në kërkim e dy të tjerë, ku njëri prej tyre rezulton të jetë shtetas turk.
Konkretisht në prangat e Policisë ranë shtetasit: Luan Haka, Ali Bushati dhe Xhuljo Lecaj, Arjan Hida, ndërkohë që u shpall në kërkim djali i xhaxhait të Hakës, Lindion Haka si dhe shtetasi turk Ozkan Sulun. Ndërkohë, që u proceduan penalisht edhe katër punonjësit e këtyre magazinave.
Policia falë hetimeve ranë në gjurmët e dy magazinave të pozicionuara në “Rrugën e Arbrit”. në fshatin Brrar.
Si rezultat i ndërhyrjes së menjëhershme, u konstatua se 2 magazinat ishin të pajisura me linja makinerish për qepje, printim dhe stampim me logo false, të markave të njohura ndërkombëtare, të veshjeve dhe aksesorëve të dyshuar të kontrabanduar.
Materialet procedurale iu referuan Prokurorisë së Tiranës, për veprime të mëtejshme, për veprat penale “Shkelja e të drejtave të pronësisë industriale”, “Punësimi i paligjshëm”, “Kontrabanda me mallra të tjera”, “Tregtimi dhe transportimi i mallrave që janë kontrabandë”, “Ruajtja ose depozitimi i mallrave kontrabandë”, “Fshehja e të ardhurave”, “Falsifikimi i vulave, i stampave ose i formularëve” dhe “Moskallëzimi i krimit”.