Andre Bell, një lojtar i njohur i basketbollit të Universitetit të FIsk, është ndarë nga jeta pas një atentati që i është bërë në Neshvill në SHBA.
Lojtari 20-vjeçar ishte me dy shokë të tij në një makinë Nisan Sentra, teksa po largoheshin pas një eventi në palestrën universitetit. Sipas burimeve policore, në ato momente makina e tyre është qëlluar me armë zjarri nga një tjetër automjet që i ishte afruar.
“Sentra reduktoi shpejtësinë, por ndërroi korsi duke kaluar në sensin tjetër të trafikut dhe duke u përplasur me një kamionçinë të kuqe. Makina tjetër vazhdoi rrugën e saj”, shpjegojnë burimet policore, të cilat bënë të ditur se basketbollisti kishte marrë një plumb në kokë dhe pavarësisht transportimit me urgjencë në spital, nuk i kishte mbijetuar atentatit.
Policia po heton shkaqet e kësaj ngjarje të rëndë, ndërsa deri tani nuk ka pista të qarta pasi edhe dy shokët e tij që ishin në makinë, bënë të ditur se në ato momente ishin “të zënë me celularët” dhe nuk kishin parë se çfarë ndodhi.
PANORAMA
