Aleat i Berishës, por në çdo nismë. Fatmir Mediu, kreu i partisë Republikane ka lajmëruar se nesër do të jetë prezent në protestën që do të mbahet në Tiranë në mbështetje të ish-krerëve të UÇK-së.
Në parlament, Mediu ju përgjigj ftesës së kreut të grupit socialist Taulant Balla, duke i thënë se do të jetë aty ku është edhe Kosova. E ndërsa asnjë prej demokratëve nuk do të marrë pjesë, Fatmir Mediu, i cili në fillimet e tij ka qenë pjesë e kësaj partie e sot një aleat i ngushtë i Berishës, ka vendosur mos të ‘bindet’ duke dalë nga ‘rreshti’.
“Nuk të pyes ty Taulant, dhe s’pres ftesë nga ty. Unë do të jem aty ku është Kosova. Do të jem në protestë si qytetar”, tha Media sot, pas thirrjes së socialistit Taulant Balla në Kuvend.
Kjo protestë është organizuar nga Organizata e Veteranëve të Luftës (OVL) për të kërkuar lirinë e ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Jakup Krasniqi e Rexhep Selimi, të cilët prej 2020 mbahen të izoluar në dhomat e paraburgimit të Hagës të akuzuar për krime lufte e krime kundër njerëzimit.
Partia Socialiste me në krye kryeministrin Edi Rama ka mbështetur këtë protestë, ndërsa deri dje pritej dhe prezenca e vetë Ramës në shesh. Por, sot u bë me dije se Edi Rama nuk ka pranuar të marrë pjesë duke e arsyetuar vendimin e tij se prezenca e tij vetëm sa do e politizonte situatën dhe nuk do t’i shërbente qëllimit.
Ndërkohë, Berisha sot tha se kjo protestë nuk është rruga e duhur për t’i dhënë mbështetje ish-luftëtarëve të UÇK-së dhe për t’iu kundërvënë gjykatave.
“Së pari në princip unë nuk besoj kurrë se protesta është rruga për t’ju kundërvë gjykatës. edhe kur më kanë thënë kam thënë jo, asnjëherë , nuk kanë qenë protesta kanë qenë konferenca shtypi.
Jo nuk kanë protesta. Kanë qenë por unë nuk kam lejuar. Shiko, gjykatat mund të marrin, kanë absurditet të tyre, por është një lloj si të vesh një grup gazetarësh dhe të protestosh ndaj tyre. Përndryshe ti nuk do kesh gjykatë, media. Nuk jam në këtë linjë”, tha Berisha.