Reshjet intensive të shiut kanë shkaktuar përmbytje të menjëhershme në provincën veriore të Samsunit, në bregdetin e Detit të Zi në Turqi, duke krijuar situatë kaotike në disa lagje të zonës.
Sipas mediave shtetërore turke, rrugë, banesa dhe biznese u mbuluan nga uji pas daljes nga shtrati të përrenjve, ndërsa automjete të shumta u morën përpara nga rrjedha e fortë.
Agjencia turke Anadolu raportoi se të paktën 12 persona kanë përfunduar në spital me lëndime të lehta si pasojë e përmbytjeve.
Guvernatori i Samsunit, Orhan Tavli, deklaroi se katër lagje u përmbytën brenda vetëm 10 minutash pas reshjeve të dendura që goditën zonën mbrëmjen e së dielës.
“Katër lagje u përmbytën brenda 10 minutash nga reshjet intensive”, citohet të ketë thënë Tavli për Anadolu.
Situata më problematike u raportua në lagjen Havza, ku autoritetet vendore vendosën pezullimin e procesit mësimor për këtë të hënë për shkak të rrezikut dhe dëmeve të shkaktuara nga uji dhe balta.
Ndërkohë, ekipet e emergjencës vijojnë operacionet në terren për pastrimin e rrugëve, largimin e baltës dhe rikthimin e normalitetit në zonat e prekura.
Rajoni i Detit të Zi në Turqi konsiderohet një nga zonat më të rrezikuara nga reshjet ekstreme dhe përmbytjet. Kujtojmë se në vitin 2021, mbi 50 persona humbën jetën nga përmbytjet katastrofike që goditën pjesën perëndimore të këtij rajoni.
Comments are closed.