Tiranë – Ish-deputeti i Partisë Demokratike, Ervin Salianji, ka folur hapur për ambiciet e tij politike, duke sugjeruar se një ditë mund të kandidojë për kreun e partisë, megjithëse jo në një të ardhme shumë të afërt.
I ftuar në emisionin “Breaking” në Top News, Salianji iu përgjigj drejtpërdrejt pyetjes për një garë të mundshme për kreun e opozitës.
“Do isha jo i vërtetë po të thosha që nuk kam ambicie,” theksoi Salianji.
Ai megjithatë shpjegoi se aktualisht fokusi i tij nuk është te garat brenda partisë, por te beteja kundër qeverisë.
“Nuk ka zgjedhje tani në PD, ka një diskutim për farsën ose se si mund të forcohet PD dhe në këtë moment unë jam duke bërë atë, betejën opozitare, diskutimet me njerëzit… Kushdo që është në politikë ka ambicie, nuk mund të them [që nuk kam], por që ky nuk është momenti,” u shpreh ai.
Përveç ambicies personale, Salianji foli edhe për strategjinë e opozitës. Ai theksoi se mënyra më efektive për të detyruar ndryshimin dhe për të parandaluar manipulimin e zgjedhjeve është përmes aksionit në rrugë.
Ai bëri thirrje për një përshkallëzim të reagimit opozitar: “Duhet të ketë protesta masive, në rrugë. Duhen protesta masive për të paralizuar veprimtarinë e qeverisë për të shkuar në zgjidhje konkrete.”
Salianji shtoi se opozita duhet të analizojë me kujdes raportin e fundit të OSBE/ODIHR për të artikuluar më tej kërkesat e saj.