Të shtëna me armë zjarri janë regjistruar mesditën e sotme në lagjen Kiras në Shkodër, duke shkaktuar alarm në zonë.
Sipas raportimeve paraprake, Policia e Shkodrës ishte në ndjekje të një personi me rrezikshmëri të lartë, kur gjatë operacionit janë dëgjuar të shtëna me armë zjarri në ajër.
Korrespondenti i Top Channel, Klodian Zhivani, bën me dije se në vendngjarje janë angazhuar forca të shumta policie, ndërsa zona është rrethuar dhe po kryhen kontrolle intensive.
Deri më tani nuk raportohet për persona të lënduar, ndërsa autoritetet vijojnë operacionin për kapjen e personit të dyshuar dhe për zbardhjen e plotë të rrethanave të incidentit.
Shkodër/Informacion paraprak
Rreth orës 15:10, gjatë patrullimit në lagjen “Guerrile”, shërbimet e Policisë i kanë bërë shenjë ndalimi, një automjeti me të cilin lëviznin 2 shtetas, me qëllim kryerjen e kontrolleve. Drejtuesi i automjetit nuk i është bindur urdhrit të punonjësve të Policisë, por ka shtuar shpejtësinë e lëvizjes dhe ka kryer manovra të rrezikshme me automjet.
Për këto arsye, shërbimet e Policisë i janë vënë në ndjekje automjetit. Gjatë ndjekjes, dyshohet se pasagjeri në këtë automjet, duke u larguar ka qëlluar një herë, në ajër, me armë zjarri, dhe është larguar.
Shërbimet e Policisë kanë kapur drejtuesin e automjetit, inicialet e të cilit nuk bëhen të ditura për momentin, për shkak të konfidencialitetit të hetimit.
Ndërkaq, vijon intensivisht puna për lokalizimin dhe kapjen e pasagjerit në këtë automjet.
Grupi hetimor, në drejtimin e Prokurorisë, po punon për të zbardhur rrethanat e rastit.