Meteorologia Rezarta Xhakollari ka sjellë parashikimin e shumëpritur për ditët e fundit të vitit 2025 dhe fillimin e vitit 2026, duke dhënë një panoramë të qartë për të gjithë ata që po planifikojnë festat, udhëtimet apo pushimet e fundvitit.
A ka ngrica? A do të ketë shi? A është moti “në krahun tonë” apo gati të na surprizojë? Përgjigjja është: po për diellin, po për të ftohtin dhe po për ndryshimin e menjëhershëm të kushteve atmosferike.
Sipas Xhakollarit, ditët e fundit të dhjetorit do të karakterizohen nga mot i thatë dhe me diell, por kjo qetësi vjen e shoqëruar me ulje të ndjeshme të temperaturave, veçanërisht gjatë orëve të mëngjesit dhe natës.
31 dhjetori pritet të nisë me ngrica, ku në zonat veriore temperaturat në mëngjes mund të zbresin deri në -5°C, ndërsa gjatë mesditës maksimalet do të luhaten nga 10 deri në 12°C. Pra, diell gjatë ditës, por të ftohtë që “të kafshon” në agim.
Ndërsa shumëkush do ta presë Vitin e Ri nën qiell të kthjellët, 1 janari 2026 do të nisë po ashtu me diell, por me temperatura të ulëta dhe ngrica, duke e bërë mëngjesin e Vitit të Ri mjaft të ftohtë.
Ndryshimi i madh pritet të vijë shpejt. Më 2 janar, sipas parashikimit të meteorologes, nisin reshjet e shiut, duke shënuar një kthesë të dukshme të motit.
“Pra, kemi një fundvit të thatë dhe me diell, ndërsa fillimi i vitit 2026 do të jetë më i lagësht dhe më i ftohtë”, thekson Xhakollari, duke këshilluar kujdes për ata që udhëtojnë, sidomos në zonat malore ku ngricat mund të krijojnë vështirësi.
