Policia Metropolitane e Mbretërisë së Bashkuar ka nisur zyrtarisht një hetim ndaj Peter Mandelson, ish-ministër i qeverisë britanike, lidhur me akuza për sjellje të keqe në ushtrimin e detyrës publike. Lajmi u konfirmua pas publikimit të dokumenteve të reja gjyqësore që lidhen me financierin e ndjerë Jeffrey Epstein.
Komandantja e Policisë Metropolitane, Ella Marriott, deklaroi se hetimi është hapur pas marrjes së disa raportimeve për shkelje të dyshuara të detyrës publike, përfshirë edhe një referim zyrtar nga Qeveria e Mbretërisë së Bashkuar.
“Mund të konfirmoj se Policia Metropolitane ka nisur një hetim ndaj një burri 72-vjeçar, ish-ministër i qeverisë, për vepra të dyshuara të sjelljes së keqe në ushtrimin e detyrës publike”, tha Marriott, duke shtuar se policia do të vlerësojë të gjitha informacionet relevante dhe nuk do të komentojë më tej në këtë fazë.
Hetimi vjen pas publikimit të miliona dokumenteve nga Departamenti Amerikan i Drejtësisë, të cilat lidhen me çështjen Epstein. Sipas raportimeve, disa prej dokumenteve sugjerojnë shkëmbime emailesh dhe komunikime mes Mandelson dhe Epstein, që përfshinin diskutime mbi çështje qeveritare dhe politike, në një periudhë kur Mandelson shërbente si sekretar i biznesit dhe zëvendëskryeministër de facto në qeverinë e ish-kryeministrit Gordon Brown.
Pas njoftimit të policisë, një zëdhënës i qeverisë britanike deklaroi se ekzekutivi është i gatshëm të ofrojë çdo mbështetje dhe ndihmë të nevojshme për hetimin. Më herët, Downing Street kishte konfirmuar se Zyra e Kabinetit kishte referuar në polici shqetësimet lidhur me mënyrën se si Mandelson kishte trajtuar informacione të ndjeshme qeveritare gjatë mandatit të tij.
Edhe ish-kryeministri Gordon Brown ka bërë të ditur se i ka shkruar komisionerit të Policisë Metropolitane, Mark Rowley, për kontaktet e Mandelson me Epstein.
Ndërkohë, vetë Mandelson ka pranuar më parë se kishte gabuar duke ruajtur lidhje me Epstein pas dënimit të këtij të fundit në vitin 2008 për sigurimin e një fëmije për prostitucion dhe për nxitjen e prostitucionit. “Gabova që e besova Epstein dhe që vazhdova lidhjen time me të. U kërkoj falje pa mëdyshje grave dhe vajzave që vuajtën për këtë”, ka deklaruar ai.
Në një intervistë të fundit për “The Times”, Mandelson iu referua disa “email-eve historike të gabuara”, për të cilat tha se i vjen shumë keq, duke e përshkruar Epsteinin si “një pleh që nuk të hiqet nga këpuca”.
Hetimi policor pritet të hedhë dritë mbi natyrën e kontakteve dhe nëse ka pasur shkelje ligjore në ushtrimin e funksioneve publike nga ish-zyrtari i lartë britanik
Comments are closed.