Një ngjarje e rëndë u shënua pas mesnate në autostradën Tiranë-Durrës, ku dy të rinj që kishin grabitur xhiron e një karburanti në Sukth u përplasën me policinë.
Autorët, të identifikuar si Ardit Domi, 28 vjeç, dhe Lorenc Çali, 27 vjeç, nga fshati Bilalas, tentuan t’i shpëtonin patrullës, por makina e tyre doli nga rruga në hyrje të Shijakut.
Në atë moment, ata hapën zjarr ndaj efektivëve, të cilët u kundërpërgjigjën. Si pasojë, Domi mbeti i plagosur dhe u dërgua në Spitalin e Traumës, jashtë rrezikut për jetën, ndërsa Çali u kap në vendngjarje dhe përfundoi në pranga.
Mësohet se të rinjtë lëviznin me një makinë të vjedhur katër ditë më parë dhe kishin vendosur një njoftues policie për të shmangur kontrollet. Gjatë kontrollit të mjetit u sekuestrua një armë automatike me dy krehra fishekësh dhe pajisja e përdorur për t’u maskuar si pjesë e strukturave të rendit.
Ngjarja u shoqërua me panik tek qytetarët, të cilët raportuan të shtënat pranë JOQ Albania, duke treguar se krisma dhe thirrjet i kishin trembur gjatë natës.
