Pas lajmit se Prokuroria e Posaçme (SPAK) ka marrë nën hetim zëvendëskryeministren dhe ministren e Infrastrukturës, Belinda Balluku, kryeministri Edi Rama reagoi në fundjavë duke u distancuar plotësisht nga çështja. Për “Deutsche Welle”, Rama u shpreh se “drejtësia bën punën e saj”, duke lënë të kuptohet se nuk ka ndërmend të ndërhyjë në asnjë proces që po zhvillohet ndaj bashkëpunëtorëve të tij të afërt. “Nuk kam asnjë koment për asnjë rast.
Ne kemi punën tonë, drejtësia punën e vet dhe deri kur çështje të caktuara marrin formën e tyre të prerë, të gjithë njerëzit janë të pafajshëm dhe janë të padënueshëm nga gjykata popullore e politike dhe e mediave që i shërbejnë politikës”, tha Rama për DW. Ky reagim sinjalizon se Balluku është lënë të përballet e vetme me hetimet e SPAK-ut. Burime nga mazhoranca thanë se Rama i ka kërkuar zëvendëskryeministres të dorëhiqet për të mos e përfshirë qeverinë në një skandal që po zgjerohet, por ajo ka refuzuar prerë. Kështu që, mesa duket, Rama do të vazhdojë me të njëjtin qëndrim edhe në momentin kur Balluku të bjerë përfundimisht në rrjetën e SPAK, duke përsëritur fabulën se ajo ka ngrënë “kumbulla pas shpine”, pa dijeninë e tij.
Prapaskenat
Në fakt, tensionet mes tyre nuk kanë nisur tani. Marrëdhënia Rama–Balluku është përkeqësuar ndjeshëm prej disa muajsh dhe burimi kryesor i përplasjes ka qenë çështja e aeroportit të Vlorës, ku dyshohet se në këtë mes pjesë e pazareve është dhe dhëndri i saj. Pra ka dyshime për interesa të fshehta dhe emra që fshihen pas aksionerëve.
Dy aksionerët, miliarderi Behgjet Pacolli me 98% dhe ai minoritar, Valon Ademi me 2%, janë zhytur në një konflikt mes tyre për çështjen e aksioneve dhe një rol të errët në këtë sherr që ka plasur publikisht ka Belinda Balluku e cila dyshohet se po luan “fijet” për të arritur marrëveshjen e Ademit, i cili pretendon se ka kuotat e 49%, ndërsa Pacolli pretendon se është mashtruar ose se marrëveshja është anuluar. Konflikti ka futur në lojë prokurorinë dhe gjykatën e Tiranës, e cila ka pezulluar çdo veprim që do i jepte avantazh Pacollit. Vetë biznesmeni kosovar e artikuloi publikisht se ky nuk është thjesht një sherr biznesi.
Ai përbën një afërsi të errët korruptive qeveritare, ku disa institucione dhe media janë vënë në lëvizje në favor të Ademit, madje duke ngritur teorinë e komplotit të parave ruse në aeroport, për të justifikuar veprime të dyshimta. Pacolli ka denoncuar publikisht aktin noterial të vitit 2023, që sipas tij, është përdorur për të transferuar 47% të aksioneve në emër të kompanisë “2A Group” të Valon Ademit, pa dijeninë e tij dhe me deklarime të pavërteta. “Noterja Valbona Selimi ka përfshirë në akt pretendime se unë kam qenë fizikisht i pranishëm, më paskësh lexuar aktin në prani të një përkthyeseje dhe paskam nënshkruar dokumentin. Këto janë plotësisht të rreme,” shkruan Pacolli. Ai thekson se nuk ka qenë asnjëherë në zyrat e noteres Selimi, nuk e njeh atë dhe nuk ka nënshkruar ndonjë dokument. Akti i fshehtë i noteres është konsideruar nga Pacolli si element themelor i veprimtarisë së dyshuar kundërligjshëm, që nisi me tentativën e Ademit për të marrë aksione dhe u mbajt e fshehur për katër muaj deri më 18 gusht 2025.
Roli i Ballukut
Belinda Balluku dyshohet se është figura që ka lëvizur fijet e situatës për ndryshimin e aksioneve dhe duke lejuar që 47% e aksioneve të kalonin te Ademi, pavarësisht fshehtësisë dhe dyshimeve për falsifikim. E themi këtë pasi pas përfundimit të procesit me fitoren e bashkimit Mabco Construction të Pacollit me 58%, YDA Group e turqve me 40% dhe 2A Group e Ademit me 2%, turqit e YDA u tërhoqën menjëherë duke paguar vetëm 4,200 euro për 40%-shin e tyre.
Pikërisht këtu shfaqet roli i errët i Belinda Ballukut, e cila si ministre dhe përfaqësuese e Autoritetit Kontraktor, miratoi këtë kalim aksionesh. Procedurat e dyshimta, aktet noteriale të fshehta dhe miratimi i transferimeve nga Balluku, krijojnë një mozaik të manipulimeve dhe ndikimeve politike, duke e bërë situatën të ndërlikuar dhe të pazgjidhur deri në hetimet përfundimtare nga SPAK.