Uashington D.C. – Presidenti i Shteteve të Bashkuara, Donald Trump, ka njoftuar një përshkallëzim të luftës kundër “narko-terroristëve”, duke thënë se serisë së fundit të bombardimeve të anijeve në Karaibe dhe Paqësor do t’i pasojnë sulme në tokë.
Trump theksoi se operacionet e tilla nuk kërkojnë domosdoshmërisht një deklaratë zyrtare lufte nga Kongresi.
Duke folur me gazetarët në Shtëpinë e Bardhë, Presidenti u shpreh në mënyrë të prerë lidhur me qëllimin e operacioneve:
“Epo, nuk mendoj se domosdoshmërisht do të kërkojmë një deklaratë lufte.”
“Mendoj se do t’i vrasim njerëzit që sjellin drogë në vendin tonë. Dakord? Do t’i vrasim,” tha Trump.
Ai theksoi se Kongresi do të informohet për operacionet e planifikuara, duke sinjalizuar një ndërhyrje më agresive dhe të drejtpërdrejtë ushtarake kundër karteleve të drogës, të cilat administrata e tij i cilëson si kërcënim narko-terrorist.