Një histori prekëse dhe plot peripeci burokratike u trajtua në emisionin “Stop”, ku qytetarja Elisabeta Toskaj rrëfeu betejën e saj të gjatë me institucionet për njohjen ligjore të martesës së saj.
Ajo tregon se u martua me bashkëshortin në vitin 2003, ndërsa ai kishte qenë më parë i divorcuar. Çifti jetoi për rreth 15 vite në Shtetet e Bashkuara të Amerikës, ku ndërtuan jetën, punuan dhe investuan së bashku, duke qenë të dy shtetas amerikanë.
Por pas rikthimit në Shqipëri, ata u përballën me një problem serioz në dokumentacionin civil. Në certifikata, bashkëshorti rezultonte ende i divorcuar, ndërsa Elisabeta figuroi si e martuar me shtetas të huaj, pa u pasqyruar martesa e tyre reale.
Për të korrigjuar këtë situatë, çifti iu drejtua gjykatës. Shkalla e Parë vendosi në favor të tyre dhe urdhëroi korrigjimin e të dhënave, por procesi u zvarrit për vite të tëra pas apelimeve.
Fatkeqësisht, bashkëshorti i Elisabetës ndërroi jetë pas shtatë vitesh pritjeje, vetëm pak muaj para vendimit përfundimtar të Apelit. Më pas, Gjykata e Apelit la në fuqi vendimin e Shkallës së Parë, duke njohur zyrtarisht martesën e tyre.
Megjithatë, edhe sot në certifikatën e vdekjes ai vazhdon të figurojë si i divorcuar, çka ka sjellë pasoja të rënda për zonjën Toskaj.
“Pa këto certifikata unë nuk mund të bëj asgjë, as në Shqipëri dhe as në SHBA. Gjithçka që kemi ndërtuar bashkë rrezikon të më mohohet”, shprehet ajo.
Si pasojë e këtij ngërçi ligjor, Elisabeta Toskaj nuk njihet si bashkëshorte dhe as si trashëgimtare ligjore e bashkëshortit të saj, si në Shqipëri ashtu edhe në Shtetet e Bashkuara.
