Me një vendim të Qeverisë është shkrirë Drejtoria e Shërbimit të Trupit Diplomatik, funksionet e së cilës nga 1 janari 2026, do i kalojnë Shërbimeve Qeveritare.
Vendimi është miratuar në mbledhjen e sotme të Qeverisë, ndërsa procedura e shkrirjes, apo përthithjes së Drejtorisë së Shërbimit të Trupit Diplomatik (DSHTD) nga Shërbimet Qeveritare do të realizohen deri në 31 dhjetor 2025.
DSHTD kishte si funksione administrimin dhe mirëmbajtjen e pasurive të luajtshme dhe të paluajtshme, pronë shtetërore të ndodhura në territorin e R.SH-së dhe jashtë saj, të cilat janë nën përgjegjësi administrimi nga kjo drejtori. Gjithashtu, DSHTD siguron kushte të përshtatshme qëndrimi dhe ushtrimi të veprimtarisë së Trupit Diplomatik të akredituar në RSH-së, si dhe trupit diplomatik të RSH-së të akredituar jashtë vendit.
DSHTD, e cila vepron prej dekadash, kishte si funksione administrimin dhe mirëmbajtjen e pasurive të luajtshme dhe të paluajtshme, pronë shtetërore të ndodhura në territorin e R.SH-së dhe jashtë saj, të cilat janë nën përgjegjësi administrimi nga kjo drejtori. Objektet që kjo drejtori kishte në administrim janë kryesisht ato të ambasadave, apo organizatave ndërkombëtare, kryesisht të vendosura në rrugën “Skënderbej”.
Vendimi
Në mbështetje të nenit 100 të Kushtetutës, të nenit 33, të ligjit nr.7582, datë 13.7.1992, “Për ndërmarrjet shtetërore”, të ndryshuar, të ligjit nr.7961, datë 12.7.1995, “Kodi i Punës i Republikës së Shqipërisë”, të ndryshuar, dhe të neneve 13 e 15, të ligjit nr.8743, datë 22.2.2001, “Për pronat e paluajtshme të shtetit”, të ndryshuar, me propozimin e Kryeministrit, Këshilli i Ministrave
Vendosi:
1. Përthithjen e Drejtorisë së Shërbimit të Trupit Diplomatik (në vijim, DSHTD) nga Drejtoria e Shërbimeve Qeveritare (në vijim, DSHQ) dhe kryerjen e të gjitha procedurave për transferimin e funksioneve institucionale nga DSHTD-ja te DSHQ-ja.
2. DSHQ-ja kryen procedurat në funksion të trajtimit të punonjësve të DSHTD-së sipas nevojave të institucionit të DSHQ-së, në përshtatje të realizimit të funksionit institucional, në përputhje me përcaktimet e Kodit të Punës.
3. Procedurat për trajtimin e punonjësve të DSHTD-së përfundojnë brenda datës 31.12.2025, por duke respektuar, në çdo rast, parashikimet e Kodit të Punës e duke u paguar atyre të gjitha detyrimet e parashikuara nga dispozitat e tij, sipas rastit.
4. Pasuritë e paluajtshme, aktualisht në përgjegjësi administrimi të DSHTD-së, kalojnë në përgjegjësi administrimi të Këshillit të Ministrave për Drejtorinë e Shërbimeve Qeveritare, së bashku me të gjitha të drejtat e detyrimet e tjera, që lidhen me to. Kalojnë në përgjegjësi administrimi të DSHQ-së edhe të gjitha sendet e luajtshme të DSHTD-së, në përputhje me legjislacionin në fuqi.
5. DSHTD-ja përgatit inventarët e sendeve të luajtshme dhe të paluajtshme, si dhe kryen të gjitha procedurat, në përputhje me legjislacionin përkatës në fuqi. DSHQ-së i kalojnë të gjitha të drejtat e detyrimet, që lidhen me këto sende, në përputhje me legjislacionin në fuqi.
6. Dokumentacioni arkivor dorëzohet sipas përcaktimeve të legjislacionit në fuqi për arkivat.
7. Ngrihet komisioni i likuidimit i DSHTD-së, i përbërë nga 7 (shtatë) anëtarë, i cili do të përgatisë bilancet e likuidimit, inventarizimin e pasurisë, mbylljen e kontratave, përgatitjen e pasqyrave financiare dhe dorëzimin te DSHQ-ja brenda 30 (tridhjetë) ditëve nga hyrja në fuqi e këtij vendimi. Pasqyrimi te DSHQ-ja bëhet me pasqyrat financiare të vitit ushtrimor 2025.
8. Pas përfundimit të likuidimit, Komisioni depoziton dokumentacionin për çregjistrimin e ndërmarrjes në Qendrën Kombëtare të Biznesit.
9. Në vendimin nr.840, datë 17.12.2004, të Këshillit të Ministrave, të ndryshuar, bëhen ndryshimet, si më poshtë vijon:
a) Në titullin e vendimit dhe kudo në tekst, emërtesa “Drejtoria e Shërbimit të Trupit Diplomatik” dhe shkurtesa “DSHTD” zëvendësohen me fjalët “struktura përgjegjëse për shërbimin e trupit diplomatik në Drejtorinë e Shërbimeve Qeveritare”.
b) Pika 1 shfuqizohet.
10. Në shkronjën “k”, të pikës 2, të vendimit nr.34, datë 7.1.1999, të Këshillit të Ministrave, “Për Drejtorinë e Shërbimeve Qeveritare dhe trajtimin e personaliteteve të larta të Këshillit të Ministrave”, të ndryshuar, fjalët “… nëpërmjet drejtorisë përkatëse në varësi të saj …” zëvendësohen me “… nëpërmjet strukturës përgjegjëse në përbërje të saj …”.
11. Ngarkohen Drejtoria e Shërbimit të Trupit Diplomatik dhe Drejtoria e Shërbimeve Qeveritare për zbatimin e këtij vendimi.
Ky vendim hyn në fuqi pas botimit në “Fletoren zyrtare”.
