Kryeministri Edi Rama hodhi sot piketat e sesionit të ri parlamentar, ku çdo gjë duhet të bëhet siç thotë ai. Në një mbledhje maratonë të grupit socialist, ku pati vetëm show dhe propagandë, Rama kërkoi që Kuvendi të kthehet në një noter për qeverinë, teksa u kërkoi të vetëve që të tregojnë forcën përballë opozitës.
Mbledhja u trumbetua me të madhe që disa ditë më parë, teksa u fol se Rama mund të bënte dhe lëvizje në qeveri. Kjo gjë nuk ndodhi, por Rama duket se i la në ankth ministrat. Kryeministri e përmendi dy herë në takim se disa gjëra nuk po i deklaron sot, pasi do t’i thotë në mbledhjen e Asamblesë së PS.
“Asnjë nga këto nuk pengon një pjesë të madhe të punës që bëjmë, por ndihmojnë për t’i dhënë hapësirë dhe energji punës së deputetëve. Ribraktisja e territorit nuk mund të jetë opsion për këtë grup parlamentar dhe për këtë do flasim më konkretisht në Asamble, por 83 mandatet e kërkojnë këtë me ngulm. 83 mandate imponojnë shumë gjëra për këtë forcë politike”, tha Rama në hapje të mbledhjes.
Mbledhjen e Asamblesë ai e përmendi edhe në fjalimin përmbyllës: “Paralelisht me këtë, në Asamblenë e ardhshme do të lançojmë edhe fushatën e re të anëtarësimeve në Partinë Socialiste që do të jetë fushata e pranverës. Historikisht ndodh kjo, kur të tjerët merren me humbjen e shkuar, ne merremi me fitoren e radhës. Kemi zgjedhjet në 2027 dhe nëse gjërat do të vazhdojnë kështu dhe nëse ata vazhdojnë të besojnë që ne do të biem nga shiu, nga bora apo nga proceset e drejtësisë, rruga e të cilave është hapur prej nesh dhe garantohet prej nesh, ata le të jetojnë me këtë shpresë se në 2027 do të habiten kur të mbeten dhe pa ato 5-6 bashki që i kanë sot”.
Ndonëse Rama e shmangu totalisht drejtësinë, halli më i madh i Ramës nuk është Kuvendi, por SPAK. Dosjet e fundit e kanë shkundur nga themelet ekzekutivin, teksa Rama mban në qeveri disa figura që nuk i njeh askush.
Teksa flet për reforma dhe integrim, duket se disa sektorë nuk po ecin si duhet. Emra si Kumbaro, Manastirliu kanë 6-10 vite në qeveri. Ndërsa shumë të tjerë kanë nga 2-3 vite. Dhe teksa Rama flet për mbledhjen e Asamblesë, shtohen dyshimet se kjo Asamble mund të sjellë ndryshime në qeveri. Historikisht Rama, kur ka pasur ndryshime të shumta në qeveri, i ka bërë në mbledhjet e Asamblesë dhe shumë emra do të jenë në ankth. /Pamfleti
