Rëndohet bilanci i zjarrit, raportohet për 40 të vd*kur dhe 100 të pl*gosur!

Policia tha se disa dhjetëra persona supozohet të kenë vdekur (10 konfirmohen, por dyshohet deri në 40 viktima) dhe rreth 100 të tjerë janë plagosur, pas një shpërthimi në një bar në resortin zviceran të skive Crans-Montana, gjatë festimeve për ndërrimin e viteve gjatë natës

Sipas policisë në kantonin Valais, zjarri në bar u shkaktua nga një shpërthim dhe jo nga një sulm terrorist. Në një konferencë për shtyp, autoritetet lokale thanë se midis viktimave ishin disa qytetarë të vendeve të tjera.

Ministria e Jashtme italiane njoftoi më vonë se policia zvicerane vlerësoi se rreth 40 persona ishin vrarë dhe se shumë prej tyre nuk ishin identifikuar ende, për shkak të djegieve të rënda që kishin pësuar trupat e gjetur.

Shërbimet shëndetësore zvicerane janë “mobilizuar në një shkallë shumë të gjerë”, tha zyrtari lokal Mathias Renard, duke vënë në dukje se 10 helikopterë dhe 40 ambulanca ishin vënë në gatishmëri operative. Ai shtoi se njësia e kujdesit intensiv të spitalit kantonal të Valais ishte tani plot, me pacientët që po transferoheshin në spitale të tjera.

“Disa nga të plagosurit janë transferuar tashmë në spitale të tjera universitare në të gjithë Zvicrën”, tha ai, duke shtuar se disa aktualisht po stabilizohen në njësitë e kujdesit intensiv dhe do të transferohen për të trajtuar lëndime të rënda, ndërsa shumica e të plagosurve ishin në gjendje të rëndë. Mediat lokale raportuan herët këtë mëngjes se numri i të vdekurve pritej të ishte veçanërisht i lartë, me vlerësime që varionin nga rreth 40 persona. Shpërthimi ndodhi rreth orës 01:30 të mëngjesit, në barin Le Constellation, i frekuentuar nga shumë turistë gjatë festimeve të Vitit të Ri. Më pas shpërtheu një zjarr, duke përfshirë ndërtesën në flakë dhe duke u vënë nën kontroll disa orë më vonë. Imazhet e transmetuara nga mediat zvicerane treguan një ndërtesë në flakë. Ekipet e shpëtimit, shumë ambulanca dhe zjarrfikëse nxituan në vendngjarje, ndërsa është vendosur një ndalim fluturimesh mbi qytet.Agjencia zvicerane e lajmeve Blick beson se zjarri mund të jetë shkaktuar nga fishekzjarrët gjatë një koncerti, por nuk ka pasur asnjë deklaratë zyrtare nga policia mbi shkakun e tragjedisë. Sipas një zëdhënësi të policisë, më shumë se 100 persona ndodheshin brenda në bar në kohën e shpërthimit. Transmetuesi publik zviceran RTS raportoi se shpërthimi ndodhi në bodrumin e dyqanit. Bari kishte një kapacitet prej 300 personash. Crans-Montana është një vendpushim luksoz skijimi i vendosur në zemër të Alpeve Zvicerane, rreth dy orë larg kryeqytetit zviceran, Bernës. Sipas BBC-së, vendpushimi do të presë një ngjarje të madhe skijimi, Kupën Botërore FIS, në fund të janarit.