Në fund të qershorit dhe fillim korrikut pritet të ndikojë një valë e fortë nxehtësie në Europë dhe Ballkan. Në pjesën më të madhe të kontinentit, temperaturat do të jenë shumë të larta, ku Franca dhe zona jugore e Anglisë do të kenë deri në 41-43°C, Portugalia dhe Spanja deri në 45°C, ndërsa në Itali dhe Ballkan temperaturat do të arrijnë nga 38 deri në 41°C.
Për vendin tonë, temperaturat parashikohen të jenë në rritje deri më 2 korrik, ku maksimalet në zonat e ulëta dhe bregdetare do të arrijnë deri në 37-39°C, ndërsa në zonat malore maksimumet do të jenë rreth 31°C. Minimalet do të variojnë nga 15°C në zonat malore deri në 23°C në zonat e ulëta.
Pas 2 korrikut pritet një rënie e lehtë e temperaturave, me maksimalet që do të zbresin rreth 35-36°C dhe këtë trend do ta vazhdojë edhe fundjava, ku temperaturat mbeten të qëndrueshme pa kalime të mëdha.
Gjatë gjithë kësaj periudhe, era pritet të jetë lehtë deri mesatare, me përforcime të përkohshme kryesisht në zonat bregdetare, duke sjellë edhe dallgë të larta në disa pika si Shëngjin, Dhërmi dhe Himarë, ku pushuesit duhet të jenë të kujdesshëm.
Reshje nuk parashikohen gjatë kësaj periudhe, që përkthehet në një rrezik të shtuar për zjarret në pyje për shkak të thatësirës dhe temperaturave të larta.
Vala e të nxehtit pritet të qëndrojë gjatë 10 ditëve të para të korrikut, me një zbutje të motit në vijim, por do të vazhdojmë të informohemi për çdo ndryshim të mundshëm.
Në rajonin e Ballkanit, temperatura do të jenë të larta përgjithësisht deri në 41°C, ndërsa në pjesën më të madhe të Europës vlerat do të luhaten, me rënie të ndjeshme kryesisht në zonat verilindore dhe qendrore të kontinentit.
Ky është parashikimi kryesor i motit për këto ditë të nxehta të fundqershorit dhe fillimit të korrikut.