Sali Berisha dhe Jozefina Topalli i bëjnë diçka të madhe Elisa Spiropalit

Në seancën e sotme plenare, ku u votuan ndryshimet e fundit në qeveri, Sali Berisha dhe Jozefina Topalli votuan kundër shkarkimit të Elisa Spiropali nga posti i ministres së Jashtme.

Spiropali u shkarkua me 83 vota pro dhe dy kundër. Nga sistemi elektronik i Kuvendit rezultoi se një nga votat kundër ishte e Sali Berishës, ndërkohë që ky i fundit në çastin kur u krye votimi, ndodhej në foltoren e Kuvendit, duke ngritur dyshime mbi mënyrën se si u regjistrua vota e tij në sistem.

Vota tjetër kundër rezultoi ajo e Jozefina Topallit. Por kjo e fundit sqaroi më pas se bëhej fjalë për një lapsus teknik.

E kontaktuar nga Vizion Plus, deputetja demokrate tha se kishte shtypur butonat në sistem për të kërkuar fjalën dhe jo për të votuar, duke sqaruar kështu keqkuptimin që ishte shfaqur në rezultatin e votimit.

“Në momentin e kaosit në Parlament, kur opozitës nuk po i jepej fjala, kam shtypur gabimisht dy butonat në sistem për të marrë fjalën. Kjo ka përkuar rastësisht me momentin e votimit për shkarkimin e një ministri. Bëhet fjalë për një lapsus teknik dhe jo për shprehje të vullnetit tim politik. Sqaroj gjithashtu se në atë moment z. Berisha ishte në foltore dhe nuk ka votuar”, u shpreh Topalli.

Sakaq kujtojmë se deputetja socialiste, Elisa Spiropali, u përplas këtë të enjte në sallën e Kuvendit me ish-kryeministrin Sali Berisha.

Spiropali theksoi se çdo detyrë në Parlament është një nder i madh për të dhe se ajo që e kishte habitur ishte fakti se largimi i saj ishte paralajmëruar më herët nga Berisha në seancë.

“E vetmja gjë që më vjen keq, largimin e paralajmëroi Sali Berisha në Kuvendin, vetëm për këtë jam e habitur jo për gjë tjetër”, tha ajo.

Pas kësaj deklarate reagoi Berisha, i cili iu kundërpërgjigj duke i thënë se për shkarkimin e saj nga kryeministri Edi Rama e ka pasur “fajin” vetë ajo, dhe jo ai, ashtu sikurse dhe ish-ministrja u shpreh.