Mbledhja e Partisë Demokratike sot në selinë blu, është zhvilluar me tone të larta e debate të shumta mes Ervin Salianjit e Sali Berishës.
Ish-deputeti tashmë prej ditësh ka prishur harmoninë brenda partisë me takimet që ka zhvilluar jashtë programit të PD në qarqe i vetëm pa prezencën e figurës së Berishës dhe as “besnikëve” të këtij të fundit.
Duke pasur parasysh identitetin që Berisha, e pazakontë ka qenë ndodhia e filmuar në dyert e selisë blu pas përfundimit të mbledhjes. Të gjithë gazetarët janë turrur për të marrë një prononcim nga Salianji, ndërsa Berisha ka mbetur i shtangur për disa momente e më pas në heshje ka kaluar përbri tyre duke hipur më pas në automjetin e tij.
Në mbledhjen e sotme Salianji bëri përgjegjës për gjendjen e PD të gjithë strukturën drejtuese ndërsa i kërkoi dorëheqjen dhe Flamur Nokës lidhur me rastin e firmave të dhëna për Avokatin e Popullit. Këto e të tjera veprime të Salianjit, jo pak herë janë parë si tentativa për të marrë karrigen e liderit historik, atë të Berishës.
Mbledhja e kryesisë së Partisë Demokratike sot ka zgjatur rreth 5 orë dhe në pjesën më të madhe të kohës është zhvilluar mes debateve dhe toneve të larta mes ish-deputetit Ervin Salianji, i cili ka prishur qetësinë brenda partisë, Sali Berishës dhe Flamur Nokës.
Shkak janë bërë takimet jashtë programit të PD të Ervin Salianjit me qytetarët fillimisht në Durrës e më pas në Gjirokastër, kohë kur Berisha vijonte me foltoren e tij poshtë zyrës së Edi Ramës. Lëvizja e Salianjit është cilësuar nga “besnikët” e Berishës së tradhëti që kërkon të fusë përçarje në parti. Një arsye më shumë ka qenë dhe Endrit Shabani që u zgjodh Avokat Populli me 35 firmat e demokratëve dhe 85 votat e socialistëve.
Ka qenë Noka që ka akuzuar ish-deputetin me një mesazh në studion e Grida Dumës se Salianji ka qenë ai që i ka bindur demokratët të votojnë për Shabanin, kohë kur të gjithë deputetët “shpërthyen” në revolta pasi PS nuk u pranoi tërheqjen e firmave.
Newsbomb.al ka zbardhur diskutimet e ndodhura në mbledhjen me dyer të mbyllura ku Berisha u ka kërkuar të gjithë deputetëve të kërkojnë falje për këtë gabim të demokratëve, ndërsa nënkryetari i partisë, Agron Gjekmarkaj iu përgjigj për kërkesën për dorëheqje, të cilën Berisha nuk e pranoi.
Sali Berisha: Duhet të kërkojmë falje publike secili prej deputetëve që ka firmosur për Avokatin e Popullit dhe Rama le ta gëzojë siç ka 98% të shkojë 99% të pushtetit.
Topalli: Jo mar mos e gëzofte.
Berisha: Ta gëzojë ne nuk do merremi as në Gjykatën Kushtetuese, ky ishte gabim dhe ne duhet ta pranojmë.
Agron Gjekmarkaj: Ofroj dorëheqjen për rastin e Avokatit të Popullit.
Në përplasjen e fortë mes Salianjit, Berishës dhe Nokës, krah ish-deputetit ka dalë anëtari Bislim Ahmeti, i cilo hapur thotë se nuk ka simpati për të, por se ka të drejtë kur flet për gjendjen aktuale të PD, duke bërë përgjegjës Nokën.
Bislimi Ahmetaj: Mendoj që përgjegjësinë e ka Flamur Noka për gjithë këtë çorganizim të organizuar që ka partia dhe mendoj se do e kemi të vështirë të na vijnë njerëz. Me këtë reagim po neglizhojmë demokratët dhe Avokati i Popullit është përgjegjësi e Nokës. Me Salianjin nuk kam pasur simpati se jemi përplasur por sot me lëvizjet që po bën i jap të drejtë.
Flamur Noka në mbledhje ka akuzuar Salianjin se bashkëpunon me Suel Çelën, drejtues i një prej bandave të Elbasanit, për të ndaluar njerëzit të shkojnë në tubimet e PD. Debati ka shkuar deri në atë pikë sa Salianji i ka kërkuar Nokës të japë dorëheqjen nga posti i Sekretarit të Përgjithshëm të PD-së si personi përgjegjës për këtë çorganizim, për imazhin që së fundmi i është veshur PD si një strukturë e shitur tek Edi Rama.
Noka: Në Elbasan njerëzit thonë që po angazhohet Suel Çela për të mos pasur njerëz në tek foltorja dhe ky është ndikimi jot (Salianjit).
Salianji: Ende nuk e kam caktuar takimin por meqë deri sot kam menduar që s’dua përçarje dhe as dua të flas po të them që ti duhet të jesh i kujdesshëm sepse ke qenë i akuzuar para 4 vitesh se mblidhje firmat e seksioneve nën kërcënimin e Suelit, pastaj se kush e takon ju e dini që ua sjell me fakte nëse vazhdoni me këto idiotësi.
Noka: Në Gjirokastër nuk kishe kryesi.
Salianji: Lexon gjithë emrat e kryesisë, mbi 80% e kryesisë dhe salla plot, por dhe sikur pse nuk shkon ti Flamur apo ndonjë tjetër dhe t’i mbushë sallat.
Salianji: Avokati i Popullit ishte gabim strategjik, PD duhet të shkonte me një kandidat, e kemi dërguar ne para 4 vitesh Ledio Brahon kandidat të vetëm dhe e ka rrëzuar Rama, nuk mund t’u thuash ti deputetëve që firmosni kë të doni dhe pastaj thua pse na e hodhi Rama, duket si pazar tek njerëzit dhe ti Flamur meqë po i del për zot duhet të japësh dorëheqjen, për shkatërrimin e strukturës, organizimit dhe perceptimin që jeni shitur tek Rama
Mos më ndërhy se është fjala ime, mendoj që pas kësaj të vëmë mend, mos ulemi me Ramën as tek reforma zgjedhore as tek territorialja, të japim propozimin tonë, imi është të hapen listat, të kemi koalicione parazgjedhore dhe të ndryshojë mënyra e votimit për diasporën dhe tek territorialja të propozojmë bashkitë sipas propozimeve të demokratëve dhe qytetarëve.
Salianji gjithashtu ka akuzuar Berishën për mosmbështetjen e personave të dukur brenda PD duke i përmendur këtu Hysen Kadiun, më të votuarin në Tiranë nga Primaret, i cili nuk u përfshi në listat e deputetëve në zgjedhjet e 11 majit. Berisha justifikohet duke thënë se ai nuk punoi në fushatë.
Sali Berisha: Hysen Kadiu ka ikur në fushatë në Amerikë, ia kam premtuar që do jetë në listë të sigurt por s’e mbajta dot por ai iku ma ka thënë.
Salianji: Ja qenë në fushatë dhe ke foto të tij nëpër zona dhe duke bërë thirrje për fushatë për të votuar PD
Berisha: Po gënjen ai s’ka punuar.
Salianji: Edhe falë tij jemi 2800 vota para, fjalën “gënjen” tërhiqe. Të respektoj si kryetar partie por fjalën “gënjen” tërhiqeni ose dal nga mbledhja. Salianji: Mendova që sot duhet të flisnim vetëm për skandalin Rama-Balluku, sot me këtë po zhvendosni vëmendjen, problemi qenka shqetësimi që kanë demokratët dhe jo vjedhjet e qeverisë, unë erdha t’i bëjmë gjyqin qeverisë por nëse doni për demokratët ja bëjmë, do më keni me çel në dorë për të denoncuar këdo që bashkëpunon me qeverinë.
Ndërkohë demokrati Blendi Himçi është ai që ka ndjekur rrjedhën logjike të Nokës, duke thënë se Salianji më ka telefonuar për të më kërkuar votën për Shabanin, deklaratë e cila nuk duket se e shqetësoi shumë Salianjin.
Bled Himci: Salianjin e kam mik por tek takimi i Elbasanit ka pasur njerëz të PSD dhe njerëz që s’kanë punuar për PD dhe Salianji më ka thënë që të firmosja për Endrin.
Salianji: As kam qenë në Elbasan këtë periudhë as kam bërë takim deri tani, ndërkohë që ça të them të kanë detyruar ta thuash e thua por kujtohu se ti po e shoh as nuk e paske emrin në listë, qesharak mund të bëhesh dhe me vetëdije.
Ndërkohë një sfidë e hapur për të gjithë ka qenë ajo që Salianji ka thënë në fund të mbledhjes, pasi u trajtuan takimet e tij jashtë radhe me qytetarët në rrethe.
Berisha: Takimet i kam konsideruar private.
Salianji: Nëse në takime private mbledh aq shumë njerëz vetëm mirë i bën PD-së, të dalë secili të mbledhë aq njerëz në çdo zonë dhe ne i mbushim sheshet.
Takimi i sotëm ishte ballafaqimi i parë përballë i Salianjit me kryesinë e PD qëkur vendosi të dalë nga rreshti dhe të takohet me qytetarët veçmas pa shoqërinë e Berishës.
