Një histori tragjike ka prekur zemrat e të gjithëve në Kanada, ku 29-vjeçarja shqiptare dhe nënë e katër fëmijëve, Savanah Kulla, u vra brutalisht nga partneri i saj, Anthony Deschepper, në një parking në Brampton.
Savannah la pas katër fëmijët e saj të vegjël: Joseph (6), Mathew (5), Kalem (4) dhe Skyla-Rose (1), të cilët tashmë kanë mbetur pa nënën e tyre pas kësaj tragjedie të rëndë.
Pas ngjarjes, shoqja e saj e fëmijërisë, Veronica, ka hapur një faqe në platformën “GoFundMe” për të mbledhur ndihma, të cilat do të shkojnë në kujdesin dhe edukimin e katër fëmijëve jetimë.
Në mesazhin e publikuar në faqen e donacioneve, Veronica shkruan: “Zemrat e familjes sonë janë të thyera përtej fjalëve. Savannah ishte një shpirt i bukur, një nënë dhe mike e dashur, që jetonte vetëm për fëmijët e saj. Ata ishin drita e çdo dite të saj. Tani na takon ne të sigurojmë që ata të rriten me dashurinë dhe stabilitetin që ajo do t’u kishte dhënë.”
Fondet do të përdoren për arsimin, terapinë dhe kujdesin afatgjatë të fëmijëve. Kjo ngjarje ka prekur thellë komunitetin shqiptar, i cili është mobilizuar për të siguruar një të ardhme më të qëndrueshme për të vegjlit.
