Ish-zonja e parë e Koresë së Jugut, Kim Keon Hee, është dënuar me 20 muaj burg për pranim ryshfeti nga Kisha e Unifikimit.
Vendimi u dha nga Gjykata Qendrore e Seulit, e cila urdhëroi gjithashtu konfiskimin e një gjerdani me diamant dhe kthimin e 12.85 milionë won (monedha koreane) në para, të përfituara në mënyrë të paligjshme.
Sipas gjykatës, Kim Keon Hee ka keqpërdorur pozitën e saj si zonjë e parë për përfitime personale, duke pranuar dhurata luksoze në këmbim të favoreve politike dhe biznesi.
Megjithatë, ajo u shpall e pafajshme për akuzat e manipulimit të çmimeve të aksioneve dhe për marrjen e sondazheve falas të opinionit para zgjedhjeve presidenciale të vitit 2022, të cilat u fituan nga bashkëshorti i saj, ish-presidenti Yoon Suk Yeol.
Prokuroria kishte kërkuar një dënim prej 15 vitesh burg, por gjykata vendosi një masë më të lehtë, duke argumentuar se Kim nuk kishte precedentë penalë të rëndë dhe se nuk ishte ajo që kishte kërkuar ryshfetin.
Hetimet tregojnë se ish-zonja e parë ka marrë rreth 80 milionë won në dhurata, përfshirë një gjerdan diamanti dhe çanta luksoze, nga Kisha e Unifikimit, mes prillit dhe korrikut 2022.
Ky vendim shënon një precedent historik në Korenë e Jugut, pasi për herë të parë një çift ish-presidencial dënohet në të njëjtën kohë.
Ish-presidenti Yoon Suk Yeol është dënuar më herët me 5 vite burg për abuzim me pushtetin dhe pengim të drejtësisë, pas përpjekjes së dështuar për të vendosur ligjin ushtarak në vitin 2024.
Ndërkohë, ndaj Kim Keon Hee vijojnë edhe hetime të tjera penale, që lidhen me emërime në poste shtetërore dhe përfshirje politike në favor të Kishës së Unifikimit.
