Në Fier, duket se më në fund është “zbuluar” kërcënimi kryesor i rendit publik: një adoleshent. Për t’u përballur me këtë rrezik madhor, shërbimet e Forcës së Posaçme “Shqiponja” u mobilizuan mbrëmjen e sotme me një seriozitet që zakonisht ruhet për banda kriminale, aksione anti-drogë… ose ndonjë film aksion.
Në sheshin qendror të qytetit u shfaqën dhjetëra forca policie, të pajisura dhe të pozicionuara sikur po pritej ndonjë konfrontim historik. Në vend të kësaj, në qendër të skenës u gjend një… i mitur.
Qytetarët, fillimisht të habitur, më pas kureshtarë, ndoqën spektaklin institucional që zhvillohej para syve të tyre – fatmirësisht pa incidente dhe pa përdorim force, sepse në fund të fundit, po flasim për një adoleshent, jo për një kartel.
Arsyet e shoqërimit të të miturit mbeten një mister shtetëror i nivelit të lartë, të paktën deri në publikimin e njoftimit zyrtar të Drejtorisë Vendore të Policisë Fier. Deri atëherë, qytetarët mund të qetësohen: rendi publik është i sigurt, sepse Shqiponjat janë gati të zbresin nga qielli… edhe kur përballë kanë një fëmijë.
Në pritje të sqarimeve, mbetet vetëm një pyetje:
sa forca do të duhen herën tjetër… nëse adoleshenti guxon të ecë edhe dy hapa më shumë në shesh?
