Moti i keq në veri të vendit ka shkaktuar pasojat e para. Raportohet se në Shkodër 5 mjete dhe 9 persona u bllokuan në aksin rrugor Breg Lumi – Theth rreth 100 metra larg urës së fshatit Gimaj, si pasojë e shembjes së një masivi inertesh për shkak të reshjeve intensive.
Kryebashkiaku Benet Beci bën me dije se Makineritë e rënda dhe fadromat janë vënë menjëherë në punë për zhbllokimin e rrugës, ndërsa një ekip i specializuar i emergjencave civile është nisur drejt zonës për të vlerësuar situatën dhe për të ndërhyrë me mjete të posaçme për evakuimin dhe garantimin e sigurisë së personave të bllokuar.
“Strukturat tona po punojnë me intensitet për të normalizuar qarkullimin dhe për t’u ardhur në ndihmë qytetarëve të prekur nga kjo situatë e krijuar nga kushtet e vështira atmosferike”,- thekson Beci.
Duke nisur nga mesnata e sotme dhe 3 ditët në vijim, Shqipëri do të përfshihet nga reshje të dendura shiu, me erëra të forta, por në disa zona priten edhe reshje dëbore.
Veriu i vendit është territori më i rrezikuar nga moti i keq që pritet të “pushtojë” vendin, por alarmi është ngritur edhe në Fier e Vlorë.
Qarqet që paraqesin rrezikshmëri të lartë për përmbytje për shkak të intensitetit të reshjeve janë qarqet Shkodër, Kukës, Vlorë dhe Gjirokastër, ndërsa reshje intensive në Lezhë dhe mesatare deri intensive në Dibër, Durrës dhe Tiranë.
Ministria e Mbrojtjes si dhe Agjencia Kombëtare e Mbrojtjes Civile i kanë bërë thirrje bashkive dhe strukturave vendore për të treguar kujdes të shtuar si dhe për marrjen e masave urgjente.
Për të marrë masa për shmangien e përmbytjeve, ministri i Mbrojtjes Pirro Vengu zhvilloi një inspektim në hidrocentralin e Vaut të Dejës së bashku me kryetarin e Bashkisë së Shkodrës, Benet Beci, dhe drejtorin e Agjencisë Kombëtare të Mbrojtjes Civile, Haki Çako, nga hidrocentrali i Vaut të Dejës.
Moti i keq pritet të përfshijë edhe Qarkun e Lezhës .Strukturat po monitorojnë veçanërisht funksionimin e hidrovoreve, si dhe furnizimin me energji elektrike të popullates, ndërsa ekipet në terren janë gati të ndërhyjnë në rast nevoje.
Zonat më të rrezikuara nga përmbytjet mbeten Zadrima dhe Bregu i Matës në Bashkinë Lezhë, si dhe Fushë-Kuqja në Bashkinë Kurbin.
Po ashtu punonjës, specialistë dhe inxhinierë të Drejtorisë së Ujitjes dhe Kullimit në Qarkun e Fierit kanë kaluar në gjendje alerti pas parashikimeve për reshje gjatë ditëve në vijim.
Në qarkun e Fierit kalojnë tre lumenj dy prej të cilëve Vjosa dhe Semani me prurje të konsiderueshme gjatë dimrit. Ndërkohë Shkumbini në rrethin e Lushnjës me gjithë sasinë e lartë të prurjeve paraqet rrezikshmëri më të ulët përmbytjesh.
Ndërkohë edhe Vlora si qytet por edhe qark është një nga zonat më të riskuara nga reshjet me intensitet shumë të lartë.
Ndaj edhe nga strukturat e këtij qarku është kërkuar angazhimi dhe gadishmëri maksimale nga të gjitha institucionet teksa 48 orët e ardhshme janë shumë të rëndësishme për situatën që mund të krijohet.