Numri i të vdekurve nga rrëzimi i një avioni Boeing 787 të Air India, më pak se një minutë pas ngritjes nga Ahmedabad në Indinë veriperëndimore, me destinacion Londrën, është rritur në 279.
Një total prej 279 trupash ose mbetjesh njerëzore u dërguan në spitalin e qytetit pas katastrofës, tha burimi policor, duke folur në kushte anonimiteti.
Fluturimi 171 i Air India u rrëzua disa sekonda pas ngritjes në orën 13:19 (ora lokale; 11:09 paradite ET) gjatë rrugës për në Aeroportin Gatwick të Londrës, tha autoriteti i aviacionit civil të Indisë.
Pilotët dhanë një sinjal shqetësimi ndërsa aeroplani u ngrit nga pista përpara se të humbiste lartësinë dhe të përplasej në një zonë banimi në qytetin Ahmedabad, afër aeroportit, duke goditur një kompleks banimi që strehonte mjekë dhe studentë mjekësie nga një spital aty pranë, si dhe familjet e tyre.
Boeing 787 mbante 230 pasagjerë – 169 indianë, 53 britanikë, 7 portugezë, 1 kanadez – dhe 12 anëtarë të ekuipazhit, sipas autoritetit indian të aviacionit civil.
Vetëm një nga pasagjerët, një britanik me origjinë indiane i ulur në pjesën e përparme të trupit të avionit, mbijetoi mrekullisht dhe u nxor i plagosur nga rrënojat e 787-8, një aeroplan 57 metra i gjatë me një hapje krahësh prej 60 metrash.
Ministri i Brendshëm federal i Indisë, Amit Shah, njoftoi se raporti përfundimtar i katastrofës ajrore, e cila është ndër më të këqijat e regjistruara në botë që nga viti 2000, nuk do të bëhet publik derisa të përfundojnë testet e ADN-së për të identifikuar të gjitha viktimat.
Hetuesit kanë gjetur një nga dy të ashtuquajturat kuti të zeza të avionit (regjistruesi i të dhënave të fluturimit) nga rrënojat dhe po vazhdojnë kërkimet e tyre në vendin e rrëzimit sot për të gjetur të dytën (regjistruesi i zërit në kabinën e pilotit).