Instituti Parlamentar ka publikuar emrat e figurave kombëtare që do të nderohen gjatë muajit tetor, por përfshirja e ish-diktatorit Enver Hoxha ka shkaktuar debate të forta në opinionin publik.
Vendimi, që mban firmën e kryetarit të Kuvendit, Niko Peleshi, rendit Hoxhën përkrah personaliteteve të njohura të letërsisë dhe historisë shqiptare, si Dritëro Agolli, Naim Frashëri dhe Sulejman Delvina.
Përfshirja e udhëheqësit komunist, që mbajti Shqipërinë të izoluar për 45 vite dhe internoi e burgosi mijëra qytetarë, është parë si fyerje për viktimat e diktaturës. Kritikët e konsiderojnë vendimin si një tregues të nostalgjisë për epokën komuniste, që ende ekziston në një pjesë të mazhorancës socialiste.
Pikërisht ajo që ka nxitur më shumë zemërim është përshkrimi zyrtar i Hoxhës nga Kuvendi, i cili e quan “Udhëheqës i Luftës Antifashiste Nacional Çlirimtare”, “Hero i Popullit” dhe “Hero i Punës Socialiste”.
Vendimi ka ndezur një debat të ri mbi trajtimin e trashëgimisë komuniste nga qeveria aktuale, duke ngjallur reagime të forta nga analistë, historianë dhe publik i gjerë.
