SPAK godet sërish, arrstohet bosi i madh shqiptar

Prokuroria e Posaçme (SPAK) ka zhvilluar një operacion të ri në kuadër të hetimeve për dosjen e njohur si “Frakull”, duke çuar në arrestimin e pesë personave të dyshuar për përfshirje në trafikun ndërkombëtar të kokainës.

Në pranga kanë rënë: Durim Keçi, Kevin (Arjan) Margjoni, Klevent Gjolena, Aldi Zonja dhe Musa Gjikola.

Sipas hetimeve, procedimi lidhet me një ngarkesë prej 485.5 kilogramë kokainë, e cila në vitin 2022 u importua nga Kolumbia drejt Shqipërisë duke përdorur një skemë të sofistikuar për të shmangur kontrollet doganore.

Droga ishte tretur kimikisht brenda një sasie plehu organik, ndërsa pasi mbërriti në Frakull të Fierit, grupi kishte ngritur një laborator të posaçëm ku do të kryhej procesi i nxjerrjes së kokainës së pastër përmes solucioneve kimike.

Emri më i njohur mes të arrestuarve është Durim Keçi, i konsideruar më herët si një nga personat më të rrezikshëm të mafies shqiptare në Itali. Ai është dënuar nga Gjykata e Genovës me mbi 9 vite burg dhe njihet edhe për përplasjet e forta me drejtësinë italiane, ku gjatë seancave gjyqësore ka kërcënuar prokurorët e Antimafias.

Gjatë operacionit, SPAK dhe Policia e Shtetit sekuestruan 4 automjete luksoze të markës Land Rover (Range Rover Sport, Evoque, Discovery dhe Velar), si dhe pajisje celulare dhe prova të tjera materiale që dyshohet se lidhen me aktivitetin kriminal.

Operacioni u realizua me mbështetjen e autoriteteve të Malit të Zi, Kolumbisë, si dhe në bashkëpunim me Europol dhe Eurojust.

Hetimet për këtë rrjet trafiku ndërkombëtar droge vijojnë, ndërsa autoritetet po verifikojnë edhe persona të tjerë që mund të jenë të përfshirë në këtë skemë kriminale