Në një deklaratë të bërë së fundmi publikisht në media, e ftuar në një intervistë, ministrja e Jashtme Elisa Spiroali duket se ka shënjestruar zv/kryeministren Belinda Balluku.
Në deklaratën e saj pa emra, Spiropali tashmë e kaluar në krahun e majtë të Ramës, pasi të djathin ia rrëmbeu Bela, nënkuptoi disa fjalë të shënjestruara për këtë të fundit duke i thënë “i kam lënë Zotin”. Balluku është thirrur në SPAK për shkelje të barazisë në tendera.
“Ka ca njerëz që besojnë vetëm tek vetja dhe mendojnë se janë Zot, se i kanë të gjitha në dorë, mendojnë që mund të ndikojnë mbi fatet e të tjerëve, mendojnë që mund të shkelin njerëz me këmbë… Mendojnë që mund të tjetërsojnë fate dhe destine… unë nuk hyj në këtë kategori. Unë besoj te një forcë më e madhe dhe besoj se kjo e drejtë herët a vonë vjen.”-deklaroi Spiropali.
Më shumë mbi akuzat ndaj Ballukut do të mësohet të hënën, teksa duket se e ka lëshuar edhe Rama i cili u shpreh se drejtësia ka punën e vet, e partia të vetën.
Kryeministri Edi Rama ka thyer heshtjen për lajmet e raportuara nga mediat në Shqipëri, për thirrjen në SPAK të ministres dhe zëvendëses së tij, Belinda Balluku. Ai thotë se drejtësia do bëjë punën e saj dhe qeveria e tij punën e vet.
“Si i komentoni rastet e fundit lidhur me zonjën Balluku? Në gjitha mediat e kam lexuar që ka një thirrje për bisedë, apo ku e di unë se ç’është”, është pyetja që gazetari shqiptar Bahri Cani i ka drejtuar kryeministrit Edi Rama në Berlin.
Ashtu siç ka deklaruar dhe më herët në raste të tjera, kryeministri Edi Rama është shprehur se ai nuk i komenton vendimet e drejtësisë dhe të gjithë personat e përmendur, deri në një vendim të formës së prerë janë të pafajshëm.
“Nuk kam asnjë koment për asnjë rast sepse siç e kam thënë, ne kemi punën tonë, drejtësia ka punën e vet dhe deri kur çështje të caktuara marrin formën e tyre të prerë të gjithë njerëzit janë të pafajshëm dhe janë të padënueshëm nga gjykata popullore e politikës dhe mediave që i shërbejnë politikës”, thotë Edi Rama.
Mediat kanë raportuar dje se ministrja e Infrastrukturës dhe njëherësh zëvendëskryeministre, Belinda Balluku është thirrur ditën e hënë në SPAK. Megjithatë, deri tani nga organi i akuzës nuk ka një njoftim zyrtar për këto raportime.
Intervista e kryeministrit Edi Rama është dhënë për seksionin shqip të Deutsche welle, një rrjet publik televizivi i financuar nga shteti gjerman, i njohur gjithashtu dhe si transmetues ndërkombëtar i shërbimit publik i financuar nga Qeveria Federale e Gjermanisë.