Ambasada e Shteteve të Bashkuara të Amerikës ka reaguar për herë të parë lidhur me protestën e dhunshme të studentëve, të cilët prej ditësh kanë shkaktuar kaos në Tiranë duke djegur pronën publike dhe private.
Në një prononcim ekskluziv për “Tv Klan”, Ambasada Amerikane thekson rëndësinë e respektimit të ligjit dhe të ruajtjes së karakterit paqësor të angazhimit qytetar.
Në reagimin, SHBA u ka bërë thirrje qytetarëve që marrin pjesë në protestë, të veprojnë në mënyrë të ligjshme dhe paqësore. Përfaqësia diplomatike amerikane nënvizon se protestat duhet të zhvillohen në mënyrë të qetë, pa akte dhune dhe pa trazira.
“Nxisim qytetarët që marrin pjesë në protestë të veprojnë në mënyrë të ligjshme dhe paqësore. Trazirat e dhunshme nuk kanë vend në angazhimin qytetar“, tha Ambasada Amerikane.
Prej 4 ditësh protestat vijojnë në rrugët e Tiranës të cilat janë kthyer në një arene beteje mes të rinjve dhe policisë. Protestuesit gjatë marshimit të tyre janë konfrontuar fizikisht me Policinë e Shtetit, ndërsa kanë bërë thirrje për largimin e kryeministrit Edi Rama.
