Qeveria ka riaktualizuar nismën për krijimin e një rezerve shtetërore të naftës dhe nënprodukteve për të përballuar mungesat e mundshme në kohë krize, një projekt që parashikon një kosto të lartë dhe shtimin e një tarife të re për qytetarët.
Ideja e ngritjes së një rezerve strategjike është diskutuar shpesh, duke u parë si një masë sigurie jetike në rastet e vështira ose paqëndrueshmërisë globale.
Projektligji, i hapur për konsultim publik, parashikon krijimin e një rezerve sigurie të mjaftueshme për të paktën 90 ditë konsum mesatar ditor neto, me qëllim furnizimin e popullatës në raste emergjencash.
Për një rezervë të tillë, sipas ekspertëve të tregut, nevojiten minimalisht 270,000-300,000 ton karburant, vlera e të cilit kap shifrën e 260 milionë eurove (300 milionë dollarë).
Kostoja totale e këtij projekti arrin në shifra të larta: nëse qeveria zgjedh të marrë depozitat me qira, fatura totale (produkt + qira) arrin rreth 300 milionë euro në vit; ndërsa nëse vendos të ndërtojë vetë depozitat, duke marrë parasysh edhe koston e ndërtimit prej rreth 260 milionë euro (300 milionë dollarë), fatura totale mund të shkojë deri në 520 milionë euro, pa përfshirë kostot e mirëmbajtjes, pagave dhe energjisë.
Për të mbuluar këtë faturë, ligji parashikon ndër të tjera një burim të ri financimi: një tarifë që do t’u shtohet taksave ekzistuese të karburanteve.
Tarifa e re do të zbatohet mbi produktet energjetike hidrokarbure dhe do të përcaktohet pas miratimit të ligjit me vendim të Këshillit të Ministrave.
