Tre persona u vranë, përfshirë një foshnjë 8-muajshe, nga të shtëna me armë në një festival në West Valley City.
Zyrtarët e Departamentit të Policisë së Qytetit West Valley thanë se pesë persona u qëlluan në Centennial Park të dielën në mbrëmje. Një 18-vjeçar, një 41-vjeçare dhe një foshnjë 8-muajshe vdiqën nga plagët e marra.
Zyrtarët thanë se të shtënat ndodhën në orën 21:20 gjatë WestFest, një festival vjetor i qytetit, pasi dy grupe njerëzish patën “një grindje verbale”.
Policia iu afrua grupeve për të shpërndarë grindjen kur një i dyshuar 16-vjeçar nxori një armë dhe qëlloi disa herë drejt grupit tjetër. Një oficer u kundërpërgjigj me zjarr por nuk e qëlloi të dyshuarin. 16-vjeçari u mor menjëherë në paraburgim. Policia tha se ai është i dyshuari i vetëm në këtë ngjarje.
Zyrtarët thanë se 18-vjeçari i vrarë ishte në grupin kundërshtar të të dyshuarit, por gruaja 41-vjeçare dhe fëmija 8-muajsh ishin kalimtarë të rastit dhe nuk ishin të lidhur me grindjen. Një 17-vjeçare dhe një 15-vjeçar u qëlluan në krah. Policia nuk e di në këtë kohë nëse viktimat adoleshente ishin të përfshira në grindje.
Një grua shtatzënë u plagos gjithashtu ndërsa përpiqej të ngjitej në një gardh për t’u larguar nga vendi i ngjarjes.