Emisioni “Opinion” në Tv Klan riktheukëtë të hënë, 9 mars, edhe një herë në vëmendjen zhdukjen e mistershme të Bleona Matës në maj të vitit 2010 kur ishte vetëm 6 vjeç, e cila u shndërrua në një nga ngjarjet tronditëse dhe më të komplikuara të zhdukjes së një fëmije në Shqipëri.
Gjithçka nisi pasditen e 22 Majit në fshatin Zapod të Kukësit kur Bleona Mata kishte dalë në kullotë në një terren të vështirë.
Gjatë këtyre 16 viteve janë ngritur dyshime dhe pista të ndryshme, por të cilat nuk kanë çuar në asnjë rezultat. Gazetarja e emisionit “Pa Gjurmë” në Report Tv, Odeta Dume thotë se është ngritur një pistë tjetër ajo e një familjeje nga Vlora.
Dume thotë se ka marrë një telefonatë ku një burrë rreth të 30-ve, nga fshati Picarë i Vlorës ka thënë me bindje të plotë se vogëlushja Mata është mbajtur në atë familje.
“Pista e Vlorës, ku dyshohej se vajza ishte rrëmbyer në malin Pikëllimë nga një familje e asaj zone dhe më pas ishte dërguar në Picarë të Llakatundit. Vajza ishte mbajtur në këtë familje, kjo familje mbante mbiemrin Mata, ishte pjesë e fisit, por ishin në konflikt prej vitesh. Dyshiohet se është rrëmbyer nga kjo familje dhe është mbajtur në 2010-ën për disa javë dhe më pas ishte zhdukur. Ky informacion erdhi nga një telefonatë që mbërriti në ReportTv. Pasi e kisha trajtuar rastin e Bleona Matës kam qenë në zyrë, kur më merr një qytetar, ishte 80 vjeç. Më kërkoi që të mos e identifikoja, ishte nga Vlora dhe jetonte në Londër. Ishte nga Picari dhe më tregoi këtë informacion që vajza ka ardhur në Picarë, i bindur plotësisht. E kam dhënë informacionin në transmetim live dhe kanë shpërthyer telefonatat nga Picari. Të gjithë banorët e Picarit, të gjithë thoshin “po”, që kjo familje ka mbajtur këtë fëmijë, që qante.”
Gazetarja shton se vetë familja e Bleona Matës pohon që kanë pasur konflikt me familjen nga Vlora që ka të njëjtin mbiemër, por kjo e fundit e mohon përfshirjen në këtë ngjarje. Dume shton se ka pasur edhe hetime ndaj familjes, por deri më sot nuk është zbuluar asgjë.
“Unë kam arritur që të lidhesha me këtë familje. Si arrita unë që të lidhesha me këtë familje?! Fare thjeshtë! Telefonuan vetë. Ne nuk dhamë as emra dhe asgjë për ta identifikuar atë familje. Dhamë vetëm një informacion që ishte në familje në Picarë, ata e kuptuan dhe telefonuar. Tentuan që të hyjnë në program, thanë që nuk kemi lidhje me këtë histori, i hodhën poshtë të gjitha. Treguan vajzën e tyre. Familja është hetuar që në vitin 2010 dhe nuk është zbuluar asgjë.”
Sa i takon djalit me kapuç që është parë pasditen e 22 majit 2010, gazetarja shton se ai është identifikuar dhe është arrestuar tre vite më vonë, pas zhdukjes së Bleona Matës. Ai është kapur në flagrancë teksa tentonte që të rrëmbente një vogëlush.
“Unë nuk besoj që Bleona të ketë përfunduar në Picarë të Vlorës. Nëna e Bleonës tha që ish-vjehrra e saj kishte parë një djalë me kapuç, i cili u identifikua le të themi nga vetë familjarët. Një person që i përket një fshati ngjitur, ky person ka një të shkuar kriminale, pasi 3 vite pas humbjen së Bleona Matës ai është kapur në flagrancë duke rrëmbyer një fëmijë të vogël në fshatin e tij dhe është dënuar për rrëmbim.”