Vendi ynë është përfshirë nga një valë e të nxehti, që duket se do të vazhdojë edhe për dy ditë të tjetra.
Elvi Jahaj, sinoptikan i Shërbimit Meteorologjik Ushtarak, tha për Top Channel, se temperaturat kanë qenë në vlerat 43-44 gradë Celsius, teksa sipas tij, temperaturë rekord u shënua në Tiranë me vlerë 43.6 gradë Celsius.
Sinoptikani tha më tej se temperaturat pritet të bien duke filluar nga dita e enjte, në 37-38 gradë Celsius, dhe në ditët në vijim në 35-36 gradë Celsius.
“Mbi territorin tonë u regjistruan temperatura të larta me vlera 43 apo 42 gradë Celsius në qytete si Gjirokastra, Elbasani apo Shkodra, ndërsa për Tiranën kemi regjistruar temperaturë rekord me vlerën 43.6 gradë Celsius, pra 43-44 gradë, ndërkohë që kjo situatë është ndjerë akoma edhe më shumë për shkak të situatës së zjarreve dhe tymërave që janë në ajër.
Vendi ynë do të vijojë të ndikohet nga këto masa ajrore përvëluese të nxehta, po prap me të njëjta vlera, 42 apo 43 gradë Celsius në qytetet si Tirana, Shkodra, Gjirokastra, Elbasani, edhe për ditën e nesërme do të vijojë i njëjta situatë. Moti parashikohet i kthjellët në të gjithë territorin dhe temperatura deri në 43 gradë celsius përgjatë ultësirës perëdnimore.
Presim që gradualisht, rreth mesditës, temperaturat të zbresin, duke filluar që nga dita e enjte, me vlerat 37 apo 38 gradë celsius, ndërsa për ditën e premte, të shtunë dhe të dielë, pritet një rënie e mëtejshme me 1 apo 2 gradë, duke bërë që rreth mesditës temperaturat të kapin vlerat 35 apo 36 gradë celsius.
Temperaturat në vlerat minimale do të zbresin në ato vlerat e netëve tropikale nga 29 apo 28 gradë celsius në vlerat 25 apo 26 gradë celsius.
Ndërsa sa i përket zjarreve, pra situatës së erës, ajo do të jetë kryesisht e lehtë me drejtim nga kuadrati i veriut me shpejtësi 1 deri në 5 metra për sekondë, por hera herës me shpejtësi në 7 apo 8 metra për sekondë.” – tha sinoptikani Elvi Jahaj.