Një aksident tragjik ka ndodhur të martën në shtetin perëndimor të Indisë, Rajasthan, ku një autobus me mbi 50 pasagjerë është përfshirë nga flakët, duke shkaktuar vdekjen e të paktën 20 personave.
Sipas autoriteteve, autobusi po udhëtonte mes qyteteve Jaisalmer dhe Jodhpur kur papritur ndaloi në anë të rrugës për shkak të tymit që dilte nga pjesa e pasme, por brenda pak minutash u përfshi i gjithi nga zjarri.
“Nëntëmbëdhjetë persona humbën jetën në vendngjarje, ndërsa një tjetër vdiq më vonë nga djegiet në spitalin e Jodhpurit,” tha për AFP zyrtari i policisë Rajesh Meena. Mediat lokale raportojnë se zjarri shpërtheu me shpejtësi të madhe, duke mos u lënë mundësi shumë pasagjerëve të shpëtonin.
Kryeministri indian Narendra Modi reagoi menjëherë, duke u shprehur “i tronditur nga humbja e jetëve njerëzore” dhe premtoi kompensim financiar prej 200,000 rupi (rreth 1,940 euro) për familjet e viktimave.
Siguria rrugore në Indi vazhdon të jetë një nga problemet më serioze në vend.