Pamje të reja kanë mbërritur në redaksinë e JOQ Albania nga ngjarja e rëndë e ndodhur pasditen e djeshme pranë Spitalit Hygeia, në rrugën dytësore që të çon drejt QTU-së. Një i ri që po lëvizte në kundravajtje, ka bllokuar totalisht qarkullimin dhe ka krijuar trafik të madh, ndërsa me ulërima të çmendura ka kërcënuar qytetarët: “Jam i çmendur, hape rrugën!”
Në videon e siguruar nga qytetarët, i riu që mesa duket e ngatërron rrugën me skenën e një filmi del nga makina me targë AB 519 NP, nxjerr armën nga brezi, dhe fillon të bërtasë në mes të rrugës, duke tronditur qytetarët përreth. Në vend të përballej me forcat e rendit, ai përballet me qytetarët e zakonshëm që, për fat të keq, janë kthyer në dëshmitarë të përditshëm të këtij lloj “show” u rrugor ku gjithçka është e lejuar, përveç sigurisë.
Ngjarja është një sinjal i qartë se në rrugët tona nuk është më frika nga aksidentet problemi kryesor, por frika nga njerëzit që nuk kontrollohen as nga vetja, as nga shteti. Me armë në brez, me britma në ajër, ky lloj personazhi i bën edhe filmat aksion të duken si dokumentarë edukativë. Institucionet? Heshtin. Ndoshta sepse “i çmenduri” tha vetë që është i çmendur dhe mesa duket, kjo në Shqipëri është justifikim zyrtar.
Ky individ, që mesa duket nuk ka kaluar as testin e vërtetimit mendor, jo më atë të patentës, shfaqet në video duke terrorizuar qytetarët me një sjellje që bën edhe filmat horror të duken komedi. Del nga makina, merr armën, kërcënon. Në vend të policisë, duket se rrugët tona tashmë kanë mbetur në dorën e atyre që e shpallin vetë veten “të çmendur” dhe e marrin lejen për të bërë ç’të duan vetëm me një britmë.
“Po lëvizja rrugës dytësore tek spitali Hygea në drejtim të QTU, ku një person më vjen përballë kundravajtje dhe ulërinte: “Jam i çmendur, hape rrugën!” Dhe në moment ka hapur krahun pak më lart dhe ka ardhur me pistoletë, ku kishte edhe shumë qytetarë që u alarmuan. Si ka mundësi ka akoma këto lloj njerëzish në rrugë?”, shkruan një qytetar.
Pyetja që lind është: çfarë duhet të ndodhë më shumë që dikush të ndalohet? Targat i ka, videoja ekziston, arma është parë, dëshmitarët janë tronditur ndoshta duhet të shpallet konkursi: “Gjej të çmendurin para se të bëjë namin tjetërkund”. Deri atëherë, ruani qetësinë. Se edhe çmenduria mesa duket, është në modë por vetëm në rrugët shqiptare.
View this post on Instagram